Astanada Abaı oblysynyń kreatıvti áleýeti tanystyryldy

«Creative Aimaq» respýblıkalyq jobasy aıasynda uıymdastyrylǵan sharada óńirdiń qolóneri, beıneleý óneri, óńirlik brendteri, ІT jáne jasandy ıntellekt baǵytyndaǵy jobalary bir alańǵa jınaqtaldy.

Óńir ákimdiginiń qoldaýymen ótken jármeńkeniń saltanatty ashylýyna Mádenıet jáne aqparat vıtse-mınıstri Evgenıı Kochetov pen Abaı oblysy ákiminiń orynbasary Meıirlan Rahanov qatysty.

Kórme-jármeńkede satylymǵa barlyǵy 842 týyndy shyǵaryldy. Onyń ishinde óńir sheberleriniń 772 qolóner týyndysy men Semeı sýretshileriniń 70 kartınasy bar.

Kórmedegi eń qymbat týyndy — Abaı oblysynyń jetekshi qylqalam sheberleriniń biri Vıktor Shmıdttiń «Raqmet jáne keshir» kartınasy. Baǵasy 2 560 000 teńge bolatyn shyǵarma máńgilik adamgershilik qundylyqtardy arqaý etedi. Sýretshi óz týyndysy arqyly alǵys aıta bilý, keshirim suraý jáne keshire bilýdiń mańyzyn alǵa tartyp, osy qasıetterdiń adam boıyndaǵy adamgershilik pen rýhanı qundylyqtardy saqtaýdaǵy rólin kórkem tilmen beıneleıdi.

Munymen qosa, kıizden jasalǵan buıymdar, tekemet, kilem, quraq kórpe, ulttyq jáne zamanaýı úlgidegi kıimder, balalar kıimi, bas kıimder, áshekeıler, sómkeler, aǵash pen teriden jasalǵan kórkem buıymdar, torsyqtar, qamshylar, ulttyq mýzykalyq aspaptar, músinder, kartınalar men kádesyılar kórme qonaqtaryna usynyldy.

— On saýsaǵynan óner tamǵan qolóner sheberleri men tiginshilerimiz bul jobadan qalys qalmady. Oblysymyzdaǵy eń úzdik ári kreatıvti sheberlermiz Astanaǵa keldi. Jalpy, 800-den astam týyndy satylymǵa qoıyldy. Kórme barysynda aǵashtan, bylǵarydan jasalǵan buıymdar, toqyma zattary elorda turǵyndary men qonaqtaryna erekshe unap jatyr. Osy is-sharanyń maqsaty — Abaı elindegi qolóner sheberleriniń áleýetin kórsetý. Sonymen qatar kórmede jasandy ıntellekt baǵytyndaǵy jetistikterimizdi jáne mýltfılm salasyndaǵy joblaramyzdy kópshilik nazaryna usyndyq. Sonyń arasynda jasandy ıntellekt pen qazaqtyń aqynyn aıtystyrýǵa múmkindik beretin ilki joba báriniń kóńilinen shyǵyp jatyr. Bul óz kezeginde biz alyp kelgen kórmeniń naqty jańalyqtarynyń biri, úlken eńbektiń nátıjesi, — dedi Abaı oblysy Mádenıet, tilderdi damytý jáne arhıv isi basqarmasynyń basshysy Janjigit Omarhan.

Kórme aıasynda Abaı mýzeıi, Abaı kitaphanasy jáne oblystyq tarıhı-ólketaný mýzeıi daıyndaǵan ekspozıtsııalar qoıyldy. Budan bólek, jármeńke barysynda óńirdiń gastronomııalyq ónimderi de usynyldy. Olardyń qatarynda «Adal as» ulttyq táttileri, BaiQymyz-2025 halyqaralyq festıvaliniń bas júldesin jeńip alǵan Abaı oblysy Abaı aýdany Sarjal aýylynyń sharýa qojalyǵy ákelgen 550 lıtr qymyz jáne Qazice kompanııasy óndiretin saýmaldan daıyndalǵan balmuzdaq bar.

«Tuńǵyshtar mekeni — kıeli Abaı eli» kreatıvti kórme-jármeńkesi eki kún qatarynan Astana qalasyndaǵy Qazaq Creative Hub ortalyǵynda ótedi.