Astanada Abaı Qunanbaevtyń ájesi týraly spektakl qoıylady
ASTANA. QazAqparat - 23-24 tamyzda elordadaǵy Q.Qýanyshbaev atyndaǵy Memlekettik akademııalyq qazaq mýzykalyq drama teatry Muhtar Áýezovtiń «Abaı joly» roman-epopeıasynyń jelisi boıynsha «Zere» atty dramanyń premerasyn usynady.
Aqyn, QR Memlekettik syılyǵynyń laýreaty Ulyqbek Esdáýlettiń jańadan qoıylǵan «Zere» dramasy kórermendi eki ǵasyrdyń shegindegi qazaq halqynyń turmysymen etene tanystyrady. Avtor keıipkerlerdiń beınesin jańadan sıpattap, urpaqtardyń jadynda qalǵan qazaq áıelderiniń ulyqtylyǵy men jasampazdyq kúshin qýattaıdy.
Alǵashynda spektakl bir otbasynyń ómiri týraly sııaqty bolyp kórinedi, al shyn máninde onda sol kezeńdegi qazaq halqynyń ómiri sıpattalady. Alyp - anadan týady. Abaıdyń ákesi Qunanbaıdyń aǵa sultan bolmas buryn, jas shaǵynda dana, meıirban anasy Zereden alǵan tálim-tárbıesi tektiliktiń nyshanyna aınalady.
Zere - otbasy, oshaq qasyndaǵy óktem báıbishe ǵana emes, eliniń muń-muqtajyn, qaıǵy-qasiretin, Reseı ımperııasynyń qaramaǵynda ótken dáýirdiń qıyndyǵyn kóre biletin dana, meıirban ana.
Pesa Qazaqstannyń Halyq artısi Gúljan Áspetovanyń sahnadaǵy 50 jyldyq shyǵarmashylyǵyna oraı jazyldy. Qazaq teatrynyń kıeli sahnasyna 1967 jyly alǵash Qaragóz bolyp qadam attaǵan aktrısa búgin, 70 jyldyq mereıtoıynda alǵashqy Zere ana obrazyna jol ashyp, ǵumyr syılamaq.
Qoıylymnyń qoıýshy-rejısseri - QR eńbek sińirgen qaıratkeri Nurqanat Jaqypbaı, qoıýshy sýretshisi Berik Býrbaev.
