Astanada abaı bol, beınekameraǵa túsip qalasyń
ASTANA. 21 qazan. QazAqparat - Elordada jol qıylystarynda jáne jurt kóp jınalatyn oryndarǵa 50-den asa aqyldy beınekamera ornatyldy.
Bul týraly Astana ákiminiń orynbasary Erlan Qojaǵapanov habarlady.
«Qazir beınetaldaý fýnktsııalary bar aqyldy kameralar engizilip jatyr. Mundaı 27 kamera asa mańyzdy 25 jerge ornatyldy, - dedi
E.Qojaǵapanov «Qylmystardyń jolyn kesý men quqyq buzýshylyqtardyń aldyn alý: qazirgi jaǵdaıy jáne jetildirý keleshegi» degen taqyrypta ótken konferentsııa barysynda.
Qazir «Qaýipsiz qala» jańasha beınebaqylaý júıesi engizilip jatyr. Ol beınetaldaý fýnktsııalary bar 10 myńǵa jýyq aqyldy kamera ornatýdy qarastyrady. Budan basqa, biryńǵaı tótenshe jaǵdaı ortalyqtary qurylady, onda qalalyq jedel kómek kórsetýshi qyzmetter túgel shoǵyrlandyrylmaqshy. Іshki ister deparmatenti operatıvti basqarý ortalyǵynyń qoldanystaǵy barlyq beınebaqylaý kameralary da bir ortaq júıege biriktiriledi.
Ákimniń orynbasary keltirgen aqparatqa sensek, jyl sońyna deıin qosymsha 139 beınekamera, keler jyly 80 kamera ornatylady. Ázirshe barlyǵy 511 kamera táýlik boıy jumys isteıdi. Olardyń kómegimen 160 qylmys ashylyp, 29 myńnan asa quqyq buzýshylyq anyqtalǵan. Sondyqtan Astanada alshań basyp júremin degen buzaqylardyń saq bolǵany jón, dep jazady «Aıqyn» gazeti.
