Astanada abattandyrý talaptaryn buzǵandarǵa 57 mln teńgeden astam aıyppul salyndy
ASTANA. KAZINFORM — Astanada jyl basynan beri abattandyrý qaǵıdalaryn buzýǵa qatysty 29 myńnan astam derek anyqtalyp, quqyq buzýshylarǵa 57 mıllıon teńgeden astam aıyppul salyndy. Bul týraly Astana qalasy Polıtsııa departamenti Nura aýdany polıtsııa basqarmasy qoǵamdyq qaýipsizdik bóliminiń tabıǵatty qorǵaý polıtsııasynyń ınspektory Aıdyn Espolov málimdedi.
Onyń aıtýynsha, mundaı quqyq buzý beınebaqylaý kameralary, reıdtik is-sharalar, turǵyndardyń habarlamalary jáne áleýmettik jelilerde jarııalanǵan materıaldar arqyly anyqtalady.
— Zańsyz qurylys pen turmystyq qaldyqtardy zańsyz tógý derekterin anyqtaýǵa baǵyttalǵan jumystar kúndelikti júrgiziledi. Quqyq buzýshdy tirkeý úshin foto nemese beınematerıaldar jetkilikti. Eger jeke tulǵa bolsa, bet-beınesi anyq kórinýi, kólikke qatysty bolsa memlekettik tirkeý nómiri, al qurylys nysany bolsa onyń naqty ornalasqan jeri kórsetilýi qajet, — dedi ol Jibek Joly telearnasynyń «Búgin LIVE» baǵdarlamasynda.
Onyń málimetinshe, jyl basynan beri QR Ákimshilik quqyq buzý týraly kodeksiniń 505-baby boıynsha abattandyrý qaǵıdalaryn buzýdyń 29 myń deregi anyqtalyp, jalpy somasy 57 mıllıon teńge kóleminde aıyppul salynǵan.
Sondaı-aq Kodekstiń 434-2-baby, ıaǵnı ortaq paıdalanatyn oryndardy lastaý boıynsha 709 quqyq buzý tirkelip, 18 mıllıon teńge kóleminde aıyppul óndirilgen.
Inspektordyń sózinshe, turǵyndar mundaı quqyq buzýdy baıqasa, 102 baılanys nómirine habarlasa alady nemese turǵylyqty jeri boıynsha ýchaskelik polıtsııa ınspektoryna júgine alady.
Aıdyn Espolov abattandyrý qaǵıdalaryn buzǵany úshin jaýapkershilik quqyqbuzýshynyń mártebesine qaraı belgilenetinin atap ótti.
— 505-bap boıynsha alǵash ret anyqtalǵan jaǵdaıda eskertý jasalýy múmkin. Al quqyq buzý qaıtalansa, jeke tulǵalarǵa 20 AEK mólsherinde aıyppul salynady. Qazirgi tańda bul 86 500 teńge. Shaǵyn bıznes sýbektileri men kommertsııalyq emes uıymdarǵa 30 AEK, orta kásipkerlik sýbektilerine 40 AEK, al iri bızneske 100 AEK mólsherinde aıyppul qarastyrylǵan, — dedi ol.
Aıta keteıik, buǵan deıin, Astanada 60 myńnan astam kamera qala tazalyǵyn baqylaıtynyn jazǵan edik.
