Astanada abattandyrý qaǵıdalaryn buzǵan 27 myńnan astam adamǵa aıyppul salyndy
ASTANA. KAZINFORM — Astanada qoǵamdyq tártip pen tazalyqty saqtaý baǵytyndaǵy reıdter barysynda qoqys tastaý, qoǵamdyq oryndarda túkirý, qaldyqtardy ruqsat etilmegen jerge tógý jáne aǵyndy sýlardy zańsyz shyǵarý derekteri anyqtalyp jatyr.
Kezekti reıd kezinde Ermek Serkebaev kóshesindegi qurylys alańdaryna irgeles aýmaqtardy tıisti deńgeıde kútip ustamaǵan ári qurylys nysandaryn qorshaý talaptaryn buzǵan eki uıym anyqtaldy. Olarǵa qatysty Ákimshilik quqyq buzýshylyq týraly kodekstiń 505-baby boıynsha ákimshilik sharalar qabyldandy.
Sondaı-aq profılaktıkalyq is-shara barysynda 34 jastaǵy azamat temeki tuqylyn jerge tastap, keıin avtokóligine otyrǵan sátte polıtsııanyń nazaryna ilikti. Quqyq buzýshynyń jeke basy anyqtalyp, oǵan zań aıasynda tıisti shara qoldanyldy.
Polıtsııanyń málimetinshe, jyl basynan beri Astanada qoǵamdyq oryndardy lastaǵany úshin 400-ge jýyq azamat jaýapkershilikke tartylǵan. Al qalalardy abattandyrý qaǵıdalaryn buzǵany úshin 27 myńnan astam adamǵa ákimshilik jaza qoldanylǵan.
Tártip saqshylary turǵyndar men qala qonaqtaryn tazalyq talaptaryn saqtaýǵa, qoǵamdyq oryndardy lastamaýǵa jáne qorshaǵan ortaǵa jaýapkershilikpen qaraýǵa úndedi.
Eske salaıyq, buǵan deıin Pavlodarda 16 myńnan astam adam tabıǵatty lastaǵany úshin jaýapqa tartylǵanyn habarlaǵan edik.
