Astanada A.Jubanovtyń týǵanyna 105 jyl tolýyna arnalǵan «Ǵasyrlar pernesi» atty mýzykalyq kesh ótedi

Kesh barysynda Astana qalasy Memlekettik fılarmonııasynyń ánshileri, atap aıtqanda QR eńbek sińirgen ártisi Ǵalııa Baıǵazınova, halyqaralyq baıqaýlardyń laýreattary Bıbigúl Januzaq, Azamat Jyltyrkózov, Janna Tapına, Ǵanı Bekmurzaev, Tatıana Hasıanova jáne Bátıma Izenaevalar qazaqtyń mańdaıyna bitken zańǵar kompozıtorlar - Ahmet Jubanov pen qyzy Ǵazıza Jubanovanyń shyǵarmalaryn oryndaıtyn bolady.

Kontsertti súıemeldeýshi - N.Tilendıev atyndaǵy dırıjerlar baıqaýynyń laýreaty Nurlan Bekenovtyń dırıjerlik etýindegi - Qazaq ult-aspaptar orkestri.

QazAqparat anyqtamasy: Ahmet Qýanuly Jubanov (1906-1968) - qazaq mýzykasyn zertteýshi kórnekti ǵalym, áıgili kompozıtor, dırıjer. Ol halyq kúılerin orkestrge laıyqtap, notaǵa túsirdi jáne qazaq mýzykasyn kúrdeli aspaptyq sımfonııalyq shyǵarmalarmen baıytty. Olar «Tájik bıi», «Qazaq bıleri», «Tólegen Toqtarov», «Arııa», «Vokaldik sıýıtasy», «Abaı sıýıtasy» jáne taǵy basqalar. Kompozıtor retinde qazaqtyń mýzykalyq mádenıetine ózindik melodııalyq órnek qosqan ondaǵan án men kúıdiń, romanstar men horlardyń, aspaptyq sımfonııalyq jáne vokaldyq shyǵarmalardyń avtory. A. Jubanovtyń kompozıtorlyq shyǵarmalarynyń kórnektileri L. Hamıdımen birlesip jazǵan «Abaı» (1944) jáne «Tólegen Toqtarov» (1947) operalary, qyzy Ǵ. Jubanova aıaqtaǵan «Qurmanǵazy» (1970) operasy. Qazaqtyń ulttyq ónerin damytýǵa qosqan úlesi úshin Qazaqstan Memlekettik syılyǵynyń laýreaty ataǵy berildi. Lenın jáne taǵy da basqa ordendermen, medaldarmen marapattalǵan.

Ǵazıza Ahmetqyzy Jubanova (1927-1993 jj.) belgili kompozıtor, KSRO Halyq ártisi, Memlekettik syılyqtyń laýreaty, professor. Jubanov Ahmet Qýanuly nyń otbasynda dúnıege keldi. Ol - "Eńlik-Kebek", "Jıyrma segiz", "Qurmanǵazy" jáne "Ǵasyrdan da uzaq kún" shyǵarmalaryna, "Legenda o beloı ptıtse", "Hırosıma", "Qarakóz", "Madam Batterflıaı" baletterine, pesalar men kınofılmderge arnap mýzyka jazdy. Ǵ.Jubanova - álemdik mýzyka sahnasynda ózindik orny bar kompozıtor, ár shyǵarmasyńda halqymyzdyń ulttyq quńdylyqtaryn qalyptastyra bilgen, tyńdarmanynyń júregine jol taba bilgen tanymal sazger.