Astanada Á. Tarazıdiń kitap kórmesi ashyldy

dep habarlaıdy QazAqparat.

Jańashyl qazaq ádebıetindegi shoqtyǵy bıik tulǵalardyń biri - QR Memlekettik syılyǵynyń laýreaty, jazýshy, kınodramatýrg Ákim Tarazı. Ol «Tasjarǵan» romanymen halyqtyń zor yqylasyna bólenip, ózindik qoltańbasymen daralandy. Qalamdastarynyń arasynda jańa zaman keıipkeriniń beınesin sheber sýretteı bilip, «Ken», «Jaza», «Bultqa salǵan uıasyn», «Jańbyrly túnder» t. b roman-povestilerimen, «Joly bolǵysh jigit», «Jáke-Jáketaı», «Jaqsy kisi» basqa da pesalarymen, «Soq, baraban», «Kókjıekke ketken iz», «Qarash-qarash oqıǵasy», «Mustafa Shoqaı» fılmderimen kópshiliktiń kóńilinen shyqqan.

«Jarty ǵasyr boıy halqyn shyǵarmashylyǵymen sýsyndatqan Ákim aǵanyń kitap kórmesiniń tusaýyn keskeli otyrmyz. Ákim Tarazıdiń shyǵarmalary: romandary, povesteri, áńgimeleri, kınostsenarııleri qazaq ádebıetiniń mol qazynasyn tolyqtyrdy. Endi jazýshynyń eńbekterin qala stýdentteri, joǵary jáne orta bilim berý mekemeleriniń muǵalimderi, oqýshylary kórip, tanysa alady. Budan buryn Ábish aǵamyz ben Farıza apamyzdyń mereıtoıyna arnalǵan bir aılyq kórmemiz ótip edi», deıdi QR UAK bas dırektory, jazýshy, dramatýrg Rahymjan Otarbaev.

Kórmede Á. Tarazıdiń ómirbaıanyn aıshyqtaıtyn hattar, fotosýretter, jeke murasyndaǵy qujattar, kitaptary, gazet-jýrnal betterindegi jarııalanymdary qoıylǵan.