Astanada 9900 orynǵa arnalǵan toǵyz mekteptiń qurylysy bastaldy

Jyl sonyna deıin árqaısysy 240 orynǵa arnalǵan eki balabaqsha qoldanysqa beriledi. Biri Saraıshyq móltek aýdanynda, ekinshisi Makarenko, Radışeva kóshe qıylysynda ornalasqan.

Qazirgi kúnde memlekettik - jeke áriptestik aıasynda 1680 orynǵa arnalǵan alty balabaqshanyń jobasy júzege asyrylýda, berilý merzimi - 2019 jyl. Sonymen qatar, jańadan ashylǵan 79 jekemenshik balabaqshada memlekettik tapsyrysty oryndaý aıasynda 6359 oryn ashylady.

Astana ákimdigi basshylyǵynyń kóshpeli keńesi barysynda Saryarqa aýdanynda ornalasqan 1 200 orynǵa arnalǵan mektep qurylysynyń barysy baıandaldy. Qurylys 2018 jyldyń tamyz aıynda aıaqtalady. Ǵımarat Kúmisbekov - Bıgeldınov, Abaı men Saryarqa dańǵyly aımaǵynda ornalasqan.

Jańa oqý jylynda mektepterde oryn tapshylyǵyn sheshý maqsatynda 2 600 orynǵa arnalǵan bes japsarly ǵımarat salynyp, qoldanysqa berildi. Jańa korpýstar myna meken jaılarda ornalasqan:  № 37 mektep - Kúıshi Dına 46/2, № 16 mektep - Kenesary 81, № 17 mektep-gımnazııa - Qabanbaı batyr 9/1, № 22 mektep- Jırentaev 16, № 32 mektep - Abylaı han 25/3. Áset Isekeshev barlyq korpýstyn daıyndyǵyn tekserdi.

Sonymen qatar, ákim kúrdeli jóndeý jumystary ótkizilgen № 29 orta mektepte boldy. Bul mektepte byltyr symnyń qysqa tuıyqtalýynan órt shyǵyp, bilim oshaǵyna aıtarlyqtaı zaqym kelgen. Osy jazda jańa blok turǵyzylyp, ınjenerlik jeliler ótkizildi, jańa terezeler men esikter ornatyldy.

Qalamyzdyń 74 orta bilim berý mekemesinde erekshe qajettilikteri bar balalarǵa arnalǵan ınklıýzıvti bilim berý uıymdastyryldy. Oqý barysyna ártúrli dıagnozy bar oqýshylar barady (qant dıabeti, epılepsııa, týa bitken damý aqaýlary, tynys demikpesi, leıkoz jáne t.b).

Sonymen qatar, Áset Isekeshev múgedek balalarǵa arnalǵan karate jáne júzý sektsııalarynyń jumysymen tanysty. Qazirgi kúni bas qalamyzda múmkindigi shekteýli balalardyń sportpen erkin shuǵyldanýyna bar múmkindik jasalýda.

Kóshpeli keńes barysynda Qarasaı batyr kóshesinde ornalasqan Kópsalaly kolledjdiń kúrdeli jóndeý jumystary týraly baıandaldy. Oqý ornynyń eki blogynda jóndeý aıaqtalǵan, úshinshi blokta jóndeý jumystary júrip jatyr.

Osy jyly 9900 orynǵa arnalǵan 9 mekteptiń qurylysy bastaldy:

1. Abaı - Bıgeldınov kósheleri qıylysynda ornalasqan 1200 oryndyq mektep;

2. Oqjetpes - Bókeev kósheleri qıylysynda ornalasqan 1200 oryndyq mektep;

3. Qorǵaljyn tasjolynda ornalasqan 900 orynǵa arnalǵan mektep;

4. Nájimıdenov - Qaldaıaqov kósheleriniń qıylysyndaǵy 1200 orynǵa arnalǵan mektep;

5. Oqjetpes - Qartaly kósheleriniń  qıylysyndaǵy 1200 oryndyq mektep;

6. Seıfýllın - Omarov kóshe qıylysynda ornalasqan 900 orynǵa arnalǵan mektep;

7. Saýran - № 26 jáne Hýseın ben Talal kósheleri qıylysynda ornalasqan 1200 oryndyq mektep;

8. № 41 - Jumabaev kósheleri qıylysynda ornalasqan 1200 oryndyq mektep;

9. № 31 - Nura Esil kósheleri qıylysynda ornalasqan 1200 oryndyq mektep.

Sonymen qatar, Imanov - Brýsılovskıı kósheleri qıylysynda 900 orynǵa arnalǵan onynshy mekteptin qurylysy josparlanǵan. Turǵyndary neǵurlym tyǵyz ornalasqan aýdandarda 37 mektep jáne 10 qosymsha qurylys júrgizý úshin jer ýchaskelerin bólý boıynsha suraqtar qaraldy.

Kóshpeli keńes barysynda, qala ákimi Áset Isekeshev bilim basqarmasynyń basshysyna jáne orynbasarlaryna qurylysy júrip jatqan bilim oshaqtaryn qadaǵalaýda ustaýdy tapsyrdy.