Astanada 90 adam qarjy saýattylyǵy boıynsha kompanııaǵa aldanǵan
Nur-Sultan qalalyq Polıtsııa departamenti baspasóz qyzmetiniń málimetinshe, «Itrade Consalting Group» JShS dırektory astanalyq turǵyndardyń senimine kirý arqyly aqshalaryn ıemdenip otyrǵan.
«Kúdikti 47 jastaǵy Qaraǵandy oblysynyń turǵyny ekeni belgili boldy. Ieliginde Almaty jáne ózge de qalalarda qarjylyq saýattylyqty úıretetin fırmalar jelisi bar. Qalalardy aralap, sonyń ishinde Nur-Sultanǵa da kelip, semınarlar ótkizgen. Sol kezde kelýshilerdi bırjadaǵy aktıvterge qarajat salyp, eselep kóbeıtýge bolatyny týraly nasıhat júrgizgen. Onyń esebinshe, salymshylar bırjaǵa salǵan qarjydan 140, 190 paıyzǵa deıin tabys alýy kerek bolǵan. Aryzdanýshylardyń ishinde 100 dollardan 150 000 dollarǵa deıin aqsha salǵandar bar», - dedi Polıtsııa departamentiniń baspasóz qyzmetinen.
Salǵan ınvestıtsııalary kútken tabysty ákelmegenin túsingen salymshylar aqyry polıtsııaǵa júgingen. Asa iri kólemde alaıaqtyq jasady degen kúdikke ilingen áıel qazir Almatydaǵy tergeý ızolıatorynda otyr.
«Onyń áreketterinen zardap shekken azamattardyń sany naqtylanyp jatyr. «Itrade Consalting Group» JShS áreketinen zardap shekken bolsańyzdar, Nur-Sultan qalasynyń Polıtsııa dpartamentine 8-7172-71-63-35, 8-7172-71-62-85 nemese 102 telefony boıynsha habarlasyńyzdar» - dep jazylǵan vedomstvo taratqan málimette.