Astanada 9 tamyz kúni Jüregımnıñ Jenımpazy festıvaline baılanysty joldar jabylady
ASTANA. KAZINFORM — Astanada 9 tamyz kúni jyl saıynǵy Jüregımnıñ Jenımpazy júgirý festıvaliniń ótýine baılanysty qaladaǵy birqatar kóshede kólik qozǵalysyna ýaqytsha shekteý engiziledi.
Osyǵan baılanysty elorda turǵyndary men qonaqtary qozǵalys baǵytyn aldyn ala josparlaýy qajet.
Saǵat 07:00–den 08:05–ke deıin Túrkistan kóshesimen Abu Dhabi Plaza ǵımaraty baǵytyna qaraı bir jolaqta kólik qozǵalysy ishinara shekteledi.
Saǵat 07:00–den 07:40–qa deıin Uly Dala dańǵyly jabylady.
Saǵat 07:10–nan 09:15–ke deıin Aqmeshit kóshesi boıymen Ekspo alańyndaǵy márege deıingi baǵytta bir jolaqta kólik qozǵalysy shekteledi.
— Júrgizýshiler men jaıaý júrginshilerge qozǵalys baǵytyn aldyn ala josparlaýǵa keńes beremiz. Aýqymdy sharaǵa túsinistikpen qaraýlaryńyzdy suraımyz, — delingen habarlamada.
JÜREGIMNIÑ JEÑIMPAZY — Qazaqstandaǵy aýqymdy qaıyrymdylyq júgirý jarystarynyń biri. Osymen toǵyzynshy ret uıymdastyrylyp otyrǵan bul is-shara myńdaǵan qatysýshyny adam ómirin saqtaýǵa jáne transplantologııany damytý ıdeıasynyń tóńiregine biriktirip keledi. Festıval aǵza transplantatsııasyn kútip júrgen patsıentterge qoldaý kórsetýge jáne qoǵam nazaryn transplantatsııa máselesine aýdarýǵa baǵyttalǵan. 21 mamyrdaǵy málimet boıynsha, transplantatsııany kútý paraǵynda 4 739 qazaqstandyq tur.
Bıyl festıvalge qatysýshylar men qonaqtardyń jalpy sany shamamen 7 myń adam. Olardyń qatarynda medıtsına qyzmetkerleri, aǵza transplantatsııasynan ótken patsıentter, bıznes ókilderi, qoǵam qaıratkerleri, kásibı sportshylar, júgirýdi áýesqoı deńgeıde serik etken azamattar jáne elorda turǵyndary bar.
Júgirý resmı ashylý rásiminen keıin saǵat 07:00–de bastalady. Qatysýshylar 10 km, 3 km jáne 1 km qashyqtyqtar boıynsha baq synaıdy.
Festıval alańy saǵat 05:30–da «Uly Dala Eli» monýmenti mańynda jumysyn bastaıdy.
Jarys aldynda qatysýshylar úshin tańǵy ıoga jáne kásibı jattyqtyrýshylardyń qatysýymen jalpy dene qyzdyrý jattyǵýlary uıymdastyrylady.
Festıval qonaqtaryn kúni boıy anımatorlar men akvagrım qyzmeti usynylatyn balalar aımaǵy, fýd-kort, qazaqstandyq brendterdiń jármeńkesi, seriktesterdiń ınteraktıvti alańdary, jedel medıtsınalyq tekserýden ótýge múmkindik beretin tegin medıtsınalyq chek-ap aımaǵy, sondaı-aq júrek-ókpe reanımatsııasy tásilderin úıretý alańy kútedi.
Orynhan, Marhaba Sábı, sondaı-aq Búrkit pen Aısha kontserttik baǵdarlamanyń hedlaınerleri bolmaq.
Júgirýge belgili qoǵam qaıratkerleri, medıtsına qaýymdastyǵynyń ókilderi, halyqaralyq uıymdardyń ókilderi jáne eriktiler qatysady. Olardyń qatarynda Heart Center Foundation qorynyń quryltaıshysy, UMC basqarma tóraǵasy, medıtsına ǵylymdarynyń doktory ıÝrıı Pıa, qordyń Qamqorshylyq keńesiniń múshesi Álisher Elikbaev jáne basqa da tanymal tulǵalar bar.
Júgirý-festıval aıasynda jınalǵan barlyq qarajat Transplantatsııany úılestirý jónindegi respýblıkalyq ortalyqqa, Qazaqstandaǵy transplantatsııa ortalyqtaryna, sondaı-aq kardıohırýrgııa men transplantologııa salasyndaǵy bilim berý jobalaryn damytýǵa baǵyttalady.
