Astanada 9 oqýshy mektep ashanasynyń tamaǵynan ýlandy
ASTANA. QazAqparat - Astanada 9 oqýshy mektep ashanasynyń tamaǵynan ýlandy, dep jazady 24.kz.
Bul týraly Tutynýshylar quqyǵyn qorǵaý departamenti basshysynyń orynbasary Maıra Júsipova málimdegen.
M. Júsipovanyń aıtýynsha, keshe qalalyq jedel medıtsınalyq járdem qyzmetine №3 mektep-gımnazııasynda bir balanyń ýlanǵany týraly habar kelgen. Alaıda oqıǵa ornyna jetken aq halattylar bir emes, 9 oqýshynyń ýlanǵanyn anyqtaǵan. Olardyń barlyǵy - 9-10 jastaǵy 3-synyp oqýshylary. Aldyn ala boljam boıynsha balǵyndar irimshikten ýlanýy múmkin. Qazir departament zardap shekken oqýshylarmen jumys isteýde. Al oqý ordasyna tekseris júrgizý úshin bas prokýratýranyń ruqsaty kerek ekendigin jetkizdi Maıra Júsipova.
