Astanada 9 myńǵa tarta qudyqqa «ustaǵysh torlar» ornatyldy
Astana ákimi Baqyt Sultanovtyń tapsyrmasy boıynsha qaıǵyly oqıǵalardyń aldyn alý maqsatynda qala ákimshiligi men kommýnaldyq qyzmetter qudyqtarǵa «ustaǵysh torlardy» ornatyp jatyr.
«Búgingi tańda Astanada 101 myńnan astam qudyq bar. Onyń 9 myńǵa jýyǵyna osyndaı torlar ornatylǵan. Polıtsııa departamenti temir-tersek qabyldaıtyn oryndardy tekserdi. Nátıjesinde 118 metall qabyldaý ornynyń 46-synyń qyzmeti toqtatyldy», - dep málimdedi Astana ákiminiń orynbasary Arman Turlybek ákimdikte ótken otyrysta.
Ol osy baǵyttaǵy jumystardyń jalǵasatyndyǵyn alǵa tartyp, máseleniń erekshe baqylaýda turǵandyǵyn málimdedi.
Arman Turlybektiń aıtýynsha, qaladaǵy tirshilikti qamtamasyz etý nysandarynyń barlyǵy qazirgi tańda shtattyq rejimde jumys isteýde. Elektr qýatymen, sýmen jabdyqtaý kezinde bolǵan ajyratýlardy qalanyń kommýnaldyq mekemeleri ýaqytynda joıǵan.
Budan bólek, elorda ákiminiń orynbasary qalany qardan tazartý sharalarynyń barysy týraly aıtyp berdi.
«Qardy tazalaý jumystary jalǵasyp jatyr. Alaıda aýdandyq ákimdikter búgingi tańda merdigerlik kompanııalardy tolyǵymen anyqtamaǵan. Bul óz kezeginde qar tazalaýdyń jyldamdyǵyna áser etedi. Bul jalpy sý tasqyny jaǵdaıyna teris áser etýi múmkin», - dedi ol.
Osy rette ol B. Sultanovtan aýdan ákimderine zańnamaǵa sáıkes tenderlik protsedýralardy júrgizýge jáne qala aýmaǵynan qardy shyǵarý boıynsha jedel jumysty júzege asyrýǵa qatysty tapsyrma berýin surady.
