Astanada 9 myń oryndyq birneshe mektep ashyldy

Atap aıtqanda, elordada bıyl qoldanystaǵy mektepter aýmaǵynda úsh ǵımarat jáne úsh jańa mektep salyndy. Oryndardyń jalpy sany 9 myńdy quraıdy.

Jańa bilim mekemeleri tórt mektepte – № 31, 40, 53 jáne 85-te úsh aýysymda oqý máselesin sheship otyr. Sondaı-aq oqýshy sany kóp alty mekteptiń - №12, 58, 71, 75, 76 jáne 84 júktemesin azaıtýǵa múmkindik berdi.

Búgin elorda ákimi Altaı Kólginov birqatar jańa bilim berý mekemelerinde boldy.

«Bizdiń aldymyzda mektep oqýshylaryn orynmen qamtamasyz etý jáne oqýǵa qolaıly jaǵdaı jasaý mindeti tur. Saýran, 5/1, kóshesinde ornalasqan mektep eki aýysymda oqytyp, jańa 2400 oqýshyǵa oryn paıda boldy. Bul aımaq turǵyndary úshin buǵan deıin oqý orny bolǵan emes. Jańa mektep №59 jáne 85 mektepterdiń úsh aýysymdyq bilim berý máselesin sheship, №76 jáne 75 mektepterdiń júktemesin azaıtady. Mektep ınteraktıvti damý kabınetimen, qashyqtan oqytýǵa arnalǵan onlaın stýdııamen jabdyqtalǵan. Stýdııada muǵalimder onlaın sabaqtaryn jazyp, vebınarlar ótkizip, tikeleı efırde kórsete alady. Bolashaqta biz bul tájirıbeni basqa mektepterde de qoldanatyn bolamyz», – dedi Altaı Kólginov.

Elorda ákimi sondaı-aq №8 ІT mektep-lıtseıinde boldy (Seıfýllın – Omarov kóshesi, eki aýysymda 1800 oryn). 60 jyl buryn salynǵan eski mektep ǵımaraty apatty dep tanylǵan bolatyn. Ótken jyldarda balalar №56 jáne 16 mektepterdiń ǵımarattarynda oqydy. Jańa mektep IT jáne STEM synyptarymen jabdyqtalǵan – oqýshylar 3D nysandaryn jasaý, robottardy modeldeý boıynsha ǵylymı jáne tehnıkalyq bilimderin praktıkada birden qoldana alady. Sonymen qatar mektepte ınklıýzııa jáne pedagogıkalyq-psıhologııalyq túzetý bólmeleri bar. Arnaıy daıyndalǵan muǵalimder erekshe qajettilikteri bar balalarmen jumys isteıdi.

Bastaýysh synyp oqýshylary mektep qabyrǵasynda «kezekshi toptar» formatynda oqıdy – synypta 15-ten kóp bala bolmaıdy, partalar shahmat tártibimen qoılady. Dezınfektsııalyq týnnelder, antıseptıkter, áleýmettik araqashyqtyq belgileri jáne maska taǵý týraly eskertýler ornatyldy.

Jalpy bıyl elordada 12 mektep salynyp, paıdalanýǵa beriledi. Bul, ótken jylmen salystyrǵanda eki ese kóp. Taǵy 12 mektep 2021 jyly salynady.