Astanada 9 mamyrǵa oraı qandaı is-sharalar ótedi
ASTANA. KAZINFORM — Astanada Jeńis kúnine oraı 9 mamyrda mazmundy merekelik baǵdarlama ótedi. Qala turǵyndary men qonaqtaryna arnap kontsertter, spektaklder, kóshe aktsııalary, kórmeler men patrıottyq bastamalar uıymdastyrylady, dep habarlaıdy Astana ákimdiginiń resmı saıty.
Merekelik is-sharalar qalanyń ártúrli aýmaǵynda ótip, mádenı, áleýmettik jáne bilim berý baǵyttaryn qamtıdy.
8 mamyr kúni saǵat 11:00–de Nurly jol temirjol vokzaly ǵımaratynda 9 mamyrǵa arnalǵan taqyryptyq kórme ashylady.
Elordanyń memlekettik arhıvi «Erlik dastany» tarıhı-qujattyq kórmesin jáne tyl eńbekkerlerine arnalǵan materıaldar ekspozıtsııasyn usynady.
Sol kúni saǵat 19:00–de E. Rahmadıev atyndaǵy memlekettik akademııalyq fılarmonııa sahnasynda «Erlik dastany» merekelik kontserti ótedi.
Sonymen qatar saǵat 19:00–de M. Gorkıı atyndaǵy memlekettik akademııalyq orys drama teatry kórermenderge «Álııa» spektaklin usynady.
9 mamyr kúni saǵat 12:00–de Ázerbaıjan Mámbetov atyndaǵy memlekettik drama jáne komedııa teatry aldynda merekelik kontsert uıymdastyrylady.
Sondaı-aq dál osy ýaqytta qalalyq alań aýmaǵynda estrada juldyzdarynyń qatysýymen Jeńis kúnine arnalǵan kontsert ótedi.
Keshki saǵat 18:00–de teatr sahnasynda «Ar adamy — Baýyrjan» qoıylymy kórsetiledi.
Sonymen qatar Mýzykalyq jas kórermen teatry sahnasynda «Mánshúk» spektakli qoıylady.
Osy kúni saǵat 18:00–de Amfıteatr aýmaǵynda merekelik kontsert ótedi.
Al Q. Qýanyshbaev atyndaǵy qazaq ulttyq mýzykalyq-drama teatry sahnasynda «Jeńis kúni» sımfonııalyq orkestr kontserti uıymdastyrylady.
Buǵan deıin Astanada 300-ge jýyq adam qatysqan patrıottyq fleshmob ótkenin jazdyq
