Astanada 9 aıda ótkir respıratorlyq vırýs ınfektsııasyna shaldyǵýdyń 40 myńǵa jýyq oqıǵasy tirkeldi

ASTANA. 6 qarasha. QazAqparat - Ústimizdegi jyldyń 9 aıynda ótkir respıratorlyq vırýs ınfektsııasyna (ÓRVI) shaldyǵýdyń 39 118 jaǵdaıy tirkeldi, sonyń ishinde 27 620-sy 14 jasqa deıingi balalar, 77 adam tumaýmen aýyrǵan. Bul týraly Salaýatty ómir saltyn qalyptastyrý ortalyǵynyń baspasóz qyzmetine silteme jasap astana.kz habarlady.

«Tumaý men ÓRVI álemdegi eń ózekti medıtsınalyq, áleýmettik jáne ekonomıkalyq másele bolyp qalýda. Dúnıejúzilik densaýlyq saqtaý uıymynyń (DDU) málimetterine sáıkes, jyl saıyn álemde 3-5 mln. jýyq adam tumaýdyń aýyr túrine shaldyǵady, 250-500 myń adam kóz jumady. Sanıtarlyq-epıdemıologııalyq saraptama jáne monıtorıng boıynsha ǵylymı-praktıkalyq ortalyǵynyń habarlaýynsha, Qazaqstanda 2012 jyly 1 044 834 ÓRVI jáne 626 tumaýǵa shaldyǵý oqıǵasy tirkelgen. El aýmaǵynda ÓRVI jáne tumaý beleń alǵan kezderdegi kóp jylǵy málimetterdi taldaý nátıjesinde qazan aıynan keler jyldyń sáýir aıyna deıin epıdemııalyq maýsymnyń bolatyny boljanyp otyr», - delingen habarlamada.

Budan basqa, 1-30 qarashada Astanada ÓRVI, tumaý jáne pnevmokok ınfektsııasynyń aldyn alý aılyǵy ótkiziledi. 1 jeltoqsannan bastap, QR halqynyń ótkir respıratorlyq vırýs ınfektsııasy men tumaýǵa shaldyǵý jaǵdaılaryna kúndelikti monıtorıng júrgiziletin bolady.