Astanada 9 aıda 6 myńǵa jýyq kóshi-qon zańnamasyn buzý oqıǵasy tirkeldi
ASTANA. 4 qazan. QazAqparat - Astana qalasynyń ІІD ústimizdegi jyldyń 9 aıynda 5700 astam kóshi-qon zańnamasyn buzý oqıǵasyn anyqtady, 182 shetel azamaty elden alastatyldy. Atalǵan faktiler boıynsha 68 mln teńgeden astam somaǵa ákimshilik aıyppul salyndy, dep habarlaıdy Astana kz.
ІІD-niń kóshi-qon jaǵdaıyn taldaý kórsetkendeı, bul salada tártip buzýshylyqqa kóbine qurylys nysandarynda jumys isteıtin shetel azamattary jol beredi.
«Keıbir qurylys kompanııalary resmı ruqsat etilgen qyzmetpen qosa, jumysqa zańsyz sheteldik jumys kúshin tartady. Eseptik kezeńde qala aýmaǵynda zańsyz jumys istegen 1,5 myń sheteldik anyqtaldy. Atalǵan faktiler boıynsha 130 adam elden shyǵaryldy, 53 jumys berýshige ákimshilik aıyppul salyndy»,- delingen aqparatta.
Baqylaýsyz kóshi-qon sheteldikterdiń ákimshilik tártip buzýshylyqtar men qylmystar jasaýyna ákep soǵady. Keıde olardyń ózderi de qylmys obektisine aınalady. Bıyl sheteldik azamattar 3,5 myńnan astam ákimshilik quqyqbuzýshylyq pen 78 qylmys jasaǵan.
Aıta keteıik, ústimizdegi jyly qańtar-qyrkúıek aılarynda Astanaǵa 70 myńǵa jýyq sheteldik kelse, sonyń ishinde 14 myńǵa jýyǵy qıyr shetelderdiń ókilderi.
