Astanada 9 aıda 15 myńnan astam jaıaý júrginshi jol qozǵalysy erejelerin buzǵan
ASTANA. 21 qazan. QazAqparat - Elordada ústimizdegi jyldyń 9 aıynda jol qozǵalysy erejelerin buzǵan 15 myńnan astam jaıaý júrginshi ákimshilik jaýapkershilikke tartyldy. Bul týraly astana.kz saıtyna qalalyq Jol polıtsııasy basqarmasynan habarlady.
«Tájirıbe kórsetkendeı, jaıaý júrginshilerdiń JQE buzý saldarynan jol-kólik apattary, qaıǵyly oqıǵalar jaǵdaılary jıi oryn alady. Jyl basynan beri Astanada jaıaý júrginshilerdiń kinásinen bolǵan 125 jol-kólik apatynda 10 adam qaza taýyp, 124-i jaraqat alǵan. Ústimizdegi jyldyń 9 aıynda Jol qozǵalysy erejelerin buzǵan 15 myńnan astam jaıaý júrginshi ákimshilik jaýapkershilikke tartyldy»,- dep habarlady vedomstvodan.
Baspasóz qyzmetiniń habarlaýynsha, jaıaý júrginshi jol qozǵalysynyń bir bóligi bolǵandyqtan jol qozǵalysy erejelerin saqtaý kerek. «Ákimshilik quqyqbuzýshylyqtar týraly» QR Kodeksine sáıkes, jol qozǵalysy erejelerin buzǵany úshin aıyppul salynady. Atap aıtqanda, tyıym salynǵan, kólik júretin jerlerden jáne baǵdarshamnyń qyzyl shamyna joldan ótkeni úshin jaıaý júrginshige 8655 teńge kóleminde aıyppul salynady. Jaıaý júrginshi jol qozǵalysy erejelerin júıeli buzǵan jaǵdaıda 15 AEK (25 965 teńge) kóleminde aıyppul salý nemese 3 táýlikke ákimshilik qamaýǵa alý sharalary qarastyrylǵan.
Astanada apattardyń aldyn alý jáne sanyn azaıtý maqsatynda apta saıyn juma kúnderi jol polıtsııasy jeke quramynyń basym bóliginiń qatysýymen «Jaıaý júrginshilerdiń qaýipsizdigi» profılaktıkalyq kúni ótkiziledi. Іs-shara barysynda joldy tyıym salynǵan jerlerden nemese baǵdarshamnyń qyzyl shamyna joldy kesip ótken tártip buzýshylarǵa basa nazar aýdarylady. Jol polıtsııasy ınspektorlary jol-kólik apattary jıi oryn alatyn jerlerde dybys kúsheıtkish quraldardyń kómegimen túsindirý jumystaryn júrgizedi.
