Astanada 880 avtobýs júrgizýshisi kólik tizgininde telefonmen sóıleskeni úshin jazalandy
ASTANA. QazAqparat - Qoǵamdyq kólik júrgizýshileri qozǵalys kezinde telefonmen sóılesken jaǵdaıda jaýapqa tartylady, dep habarlady Astana ákimdiginiń medıa ortalyǵy .
«Astana LRT» JShS fılıaly kóliktik baqylaý qyzmeti basshysynyń orynbasary Gúlden Júsipbekovanyń aıtýynsha, elordalyq kóliktik baqylaý ınspektorlary kún saıyn tekseriske shyǵady jáne JQE buzýshylyqtarynyń ártúrli túrleri anyqtalady, onyń ishinde qozǵalys kezinde telefonmen sóılesý bar.
«Jyl basynan beri avtobýs júrgizýshileriniń mobıldik telefonmen sóılesýine baılanysty 880 fakt tirkeldi. Kóliktik baqylaý ınspektorlary zań buzýshylyqqa qatysty akt toltyrady. Ol odan keıin Astana qalasynyń ІІD-ne jiberiledi. Qozǵalys kezinde telefonmen sóılesý boıynsha QR ákimshilik quqyq buzýshylyq Kodeksine saı aıyppul salynady», - deıdi G.Júsipbekova.
Al, elordalyq avtoparkter kún saıyn anyqtalǵan buzýshylyqtardy esep alyp otyrady jáne ár jaǵdaı boıynsha sheshim shyǵarady.
«Avtobýs parkterinde qaýipsizdik boıynsha keńester qurylýda. Onda talapty elemegen júrgizýshilerge qatysty tártiptik jaza qoldanylady. Ár jaǵdaı - bólek qaralady», - dedi G.Júsipbekova.
