Astanada 88 jastaǵy qartty tonaǵan kúdikti ustaldy
Polıtsııaǵa júgingen 88 jastaǵy qart túngi ýaqytta belgisiz adamnyń esik qaqqanyn aıtady. Ashqan boıda soqqy jasaǵan beıtanys jigit saýsaǵyndaǵy altyn júzigin sheship alypty. Munan soń úıin tintip, taǵy bir altyn júzikti qoldy qylǵan.
Tergeý barysynda qaskúnemniń Zataevıch kóshesindegi páterdi bir táýlikke jalǵa alǵany anyqtalady. Qarama-qarsy páterde jalǵyzbasty qarııanyń
turatynyn bilgen ol tonaýǵa bel býady.
Nur-Sultan qalalyq polıtsııa departamentiniń málimetinshe, 28 jastaǵy kúdikti ustalyp, ýaqytsha oqshaýlaǵyshqa qamaldy. Buǵan deıin de urlyq jasaǵany úshin sottalǵan bolyp shyqty. Ol altyn buıymdardy lombardqa ótkizip úlgergen.
Osyǵan oraı, Saryarqa aýdandyq polıtsııa basqarmasynyń bastyǵy Qýanysh Orynbetov qala turǵyndaryn saq bolýǵa shaqyrdy.
«Nur-Sultan qalasynyń polıtsııasy azamattarǵa, ásirese qart adamdarǵa páterdiń syrtqy esigin qulyptaýdy umytpaý, bógde adamdardy úıge kirgizbeý jáne sengish bolmaý qajettigin eskertedi», - dedi ol.
Al, shymkenttik polıtseıler Ózbekstanda qylmys jasap, Qazaqstanda jumys istep júrgen qylmyskerdi ustaǵan bolatyn.