Astanada 87 adam avtobýs júrgizýshileriniń «qara tizimine» ilikti
ASTANA. QazAqparat - Astana LRT kompanııasynyń málimdeýinshe, kún saıyn elordada avtobýs júrgizýshilerine qatysty jolaýshylar tarapynan jıyrmaǵa jýyq shaǵym kelip túsedi, dep habarlaıdy QazAqparat qala ákimdiginiń saıtyna silteme jasap.
Shaǵymdar negizinen jol erejesin buzý, júrgizýshiniń dórekilik kórsetýi, aqparatty durys bermeýi, óz mindetine salǵyrt qatysty bolady.
«Astana LRT» JShS Kólik mamandarynyń biliktiligin arttyrý ortalyǵynyń dırektory Jeńis Jalbyr jolaýshylar tarapynan eskertý alǵan júrgizýshiler úshin arnaıy kýrstardyń ótkiziletinin aıtady.
«Bizdiń ortalyqta buzýshylyqtarǵa jol bergen júrgizýshiler úshin arnaıy kýrstar uıymdastyrylady. 2018 jyly «Astana LRT» JShS kólik mamandarynyń biliktiligin arttyrý ortalyǵynda 100-den astam avtobýs júrgizýshisi oqý kýrsyn qaıta oqydy. Júrgizýshi jol qozǵalysy erejelerin buzsa nemese onyń atyna shaǵym tússe, olardyń qanshalyqty dáıekti ekendigi Kólikti baqylaý departamenti men qozǵalys qaýipsizdigi jónindegi komıssııa júrgizetin tergeý barysynda anyqtalady. Erejelerdi buzý oqıǵasy dáıekti bolsa, kompanııa parktiń basshylyǵyna júrgizýshini qaıta oqytýdan ótkizý týraly usynymyn joldaıdy. Budan bólek, onyń psıhologııalyq-fızıologııalyq portreti qaıta qurastyrylady. Kúıgelektik tanytyp, daýly máseleni ýshyqtyratyn adamnyń qoǵamdyq kólikti basqarýyna jol bermeımiz», - dep túsindirdi Jeńis Jalbyr.
Ótken jyly elordadaǵy qoǵamdyq kólik júrgizýshileriniń «qara tizimine» 87 adam engen. Olar qaladaǵy avtobýs tizginine otyrmaıdy.
«Qara tizim» birqatar buzýshylyqtyń negizinde qurylady. Máselen, qaıǵyly jaǵdaıǵa ákep soqtyrǵan JKO júrgizýshi sózsiz «qara tizimge» engiziledi. «Júrgizýshi qaıta daıyndyqtan ótse de, onyń atyna jolaýshylar tarapynan shaǵym birneshe márte tússe, biz ony jumystan bosatý týraly sheshim qabyldaımyz», - dedi «Astana LRT» JShS kólik mamandarynyń biliktiligin arttyrý ortalyǵynyń dırektory.
Alaıda, Jeńis Jalbyrdyń aıtýyna qaraǵanda, jolaýshylar tarapynan túsetin shaǵymdardyń basym bóligi negizsiz bolyp jatady.
«Qoǵamdyq kólik júrgizýshileriniń shamamen 5-10 paıyzy JKO-nyń oryn alýyna jol beredi nemese jolaýshylardan únemi eskertý alyp jatady. Qaıta oqytý sabaqtarynda ár júrgizýshige ózi jasaǵan buzýshylyqtarǵa qatysty naqty usynystar beriledi. Áleýmettik jeliler, «109» qyzmeti arqyly túsetin shaǵymdardyń jartysy dáıektiligin tappaı qalady. Bizdiń baǵdarlamalyq quraldarymyz barlyq júrgizýshilerdiń jumysyn monıtorıngten ótkizip, onyń aıaldamaǵa toqtap-toqtamaǵanyn, jolaýshylardy shyǵaryp-shyǵarmaǵanyn, esikti ashyp-ashpaǵanyn tekserýge, jolaýshylar shaǵymy týraly aqparat taratyn datchıkter, ishki jáne syrtqy kameralar avtobýstaǵy jaǵdaıdy baqylaýǵa múmkindik beredi», - dedi ol.
Aıta keteıik, Astanadaǵy avtobýs júrgizýshileri qoǵamdyq kólikti basqarý quqyǵyn beretin oqý baǵdarlamasyn oqyp-ıgeredi.
«Astananyń baǵdarlyq qoǵamdyq kólik quralynyń júrgizýshisi» tehnıkalyq mınımýmy 40 saǵattyq bes kúndik kýrstan turady. Oqý kezinde júrgizýshiler «aqyldy qaladaǵy» jol qozǵalysy erejeleriniń erekshelikterimen, jolaqysyn tóleýdiń elektrondy júıesin qoldaný erejelerimen, qalanyń barlyq baǵdarlyq jelisimen, olardyń qozǵalys syzbasymen tanystyryp, júrgizýshilerdiń ózin-ózi ustaý, múmkindigi shekteýli jolaýshylarǵa qyzmet kórsetý, alǵashqy kómek kórsetý erejeleri túsindiriledi.
