Astanada 800 balaǵa tegin fılm kórsetildi
ASTANA. QazAqparat - Jańa jyl merekesi qarsańynda elordalyq balalarǵa úsh birdeı fılm tegin kórsetildi, dep habarlaıdy QazAqparat tilshisi.
«Asyl bala» qoǵamdyq qory uıymdastyrǵan merekelik tartý Astananyń turmysy tómen otbasylarynyń balalaryna, erekshe kútimdi talap etetin jáne balalar úıiniń tárbıelenýshilerine arnaldy.
Balalarǵa A.Sataevtyń «Elbasy joly. Astana» kınoepopeıasy, T.Bekmambetovtyń «Elkı.Poslednıe» jáne Disney-diń balalarǵa arnalǵan «Shaqyldaýyq jáne tórt patshalyq» fılmi kórsetildi.
«Mereke qarsańynda astanalyq balalarǵa arnap osyndaı shara uıymdastyrýdy jón kórdik jáne mundaı shara alǵash ret uıymdastyrylyp otyr. Aldaǵy ýaqytta muny jyl saıyn ótetin dástúrge aınaldyrýdy jáne respýblıkalyq deńgeıde ótkizýdi josparlap otyrmyz. Búgin Astanada bastalǵan shara erteń Almatyda jalǵasyn tabady», - dedi «Asyl bala» qoǵamdyq qorynyń basshysy Zaǵıpa Balıeva.
Onyń aıtýynsha, balalarǵa jańajyldyq bazarlyqty uıymdastyrýǵa elordalyq kásipkerler qoldaý bildirdi jáne olarǵa tegin fılmnen bólek tátti syılyqtar úlestiriledi.
«Bul sharany ótkizýdi «Asyl bala» qoǵamdyq qory usynyp, biz qýana qoldadyq. Maqsaty- balalarǵa merekelik kóńil-kúı syılaý. Merekege balalar ata-analarymen de kelip jatyr. Sharaǵa elordanyń áleýmettik jaǵdaıy nashar otbasynan 800 bala qatysty. Aldaǵy ýaqytta qoǵamdyq qormen birlesip atqaratyn, balalarǵa arnalǵan birneshe jobalarymyz bar. Biz otbasylyq, ulttyq qundylyqtardy dáripteıtin sharalardy ótkizýge qoldaý bildirýge árqashan daıynbyz», - dedi QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen.
