Elordada 80-nen astam stıhııalyq qoqys úıindisi joıyldy
ASTANA. KAZINFORM – Elordada ruqsat etilmegen qoqys úıindilerin joıý jáne abattandyrý erejelerin buzýshylardy anyqtaý boıynsha júıeli jumys jalǵasyp jatyr. Bas qalanyń barlyq aýdandarynda amaqtarǵa turaqty monıtorıng júrgizilip, kináliler ákimshilik jaýapkershilikke tartylyp jatyr, dep habarlaıdy qala ákimdiginiń resmı saıty.
Qazirgi ýaqytta Astanada 80-nen astam stıhııalyq qoqys úıindisi joıylyp, 33,2 myń tonnadan astam qoqys shyǵaryldy. Bul jumysqa 90-nan astam arnaıy tehnıka jumyldyrylǵan.
Esil aýdanynda Hýseın ben Talal kósheleri, E-321 kóshesindegi «Aisar» TÚ aýmaǵy jáne áýejaıǵa aparatyn tasjol boıynda jumystar júrgizilip jatyr. Bul aımaqta 10 ruqsat etilmegen qoqys úıindisi joıylyp, 3 myń tonnadan astam qaldyq shyǵarylǵan. Qoqystyń qaıta paıda bolýyna jol bermeý úshin kirme joldarǵa shekteý arkalary men antıtarandyq bloktar ornatylǵan. Jumystarǵa 12 birlik tehnıka tartylǵan.
Saraıshyq aýdanynda 4 ýchaske men 15 oryn tazartylyp, 41 birlik arnaıy tehnıka jumyldyrylyp, shamamen 11,5 myń tonna qoqys shyǵarylǵan. Tazalaý jumystary Sh. Qaldaıaqov kóshesinde – Uly Dala dańǵylynan «Nurly jol» vokzalyna deıin jáne LRT jelisiniń boıynda júrgizilýde.
Saryarqa aýdanynda jyl basynan beri sanıtarlyq jaǵdaıdy baqylaý barysynda zańsyz qoqys tógilgen 10 oryn anyqtaldy. Qazirgi ýaqytta 7 qoqys úıindisi joıylyp, 6 724 tonna qoqys shyǵaryldy. Bul jumystarǵa 13 birlik tehnıka jumyldyrylǵan.
Almaty aýdanynda bıyl zańsyz qoqys tógilgen oryndar tirkelgen joq.
Baıqońyr aýdanynda esepti kezeńde 10 myń tonnadan astam qoqys shyǵarylǵan. Tazalaý 13 ýchaskede, onyń ishinde 101, Úshqońyr, Pýshkın, Óndiris, Taıbýryl, Munaıshylar kósheleri, «Alaı» bazarynyń aýmaǵy, Soltústik aınalma jol jáne basqa da jerlerde júrgizildi. Jumystarǵa 10 birlik tehnıka jumyldyryldy. Sonymen qatar, 18-ge jýyq júıeli qoqys jınalatyn oryn belgilenip, memlekettik-jekemenshik seriktestik aıasynda 13 beınebaqylaý kamerasy ornatyldy.
Nura aýdanynda eki merdigerlik uıym qatysýymen stıhııalyq qoqys úıindilerin joıý jumystary jalǵasýda. Qazirge deıin zańsyz qoqys tógiletin 40 ýchaske anyqtalyp, olardyń 7-si iri qoqys jınalatyn oshaqtarǵa jatady. 2 myń tonnadan astam qaldyq shyǵarylyp, 14 birlik tehnıka paıdalanylǵan. Qoqys tógilýdiń aldyn alý maqsatynda Taldykóldiń problemalyq aımaqtarynda – Uly Dala men Aıtmatov kósheleriniń qıylysynda, sondaı-aq Qorǵaljyn tasjoly aýdanynda «Qazaqtelekom» AQ-men birlesip ushqyshsyz ushý apparattary arqyly monıtorıng júrgizildi.
Jyl basynan beri Qazaqstan Respýblıkasynyń Ákimshilik quqyq buzýshylyq týraly Kodeksiniń 434-2 jáne 344-baptary boıynsha 345 quqyq buzýshy jaýapqa tartyldy. Aıyppuldardyń jalpy somasy shamamen 12 mıllıon teńgeni quraıdy.
2025 jylǵy qańtardan bastap QR Ákimshilik quqyq buzýshylyq kodeksiniń 344-babyna engizilgen ózgeristerge sáıkes, belgilenbegen jerlerge qoqys tastaǵany úshin aıyppul mólsheri artty. Jeke tulǵalar men kásiporyndarǵa 100-den 1000 AEK-ke deıin (393 200 teńgeden 3 932 200 teńgege deıin) aıyppul salynady. Bir jyl ishinde qaıtalanǵan jaǵdaıda aıyppul 200-den 2000 AEK-ke deıin (786 400 teńgeden 7 mıllıon teńgeden astam) deıin ósedi. Sonymen qatar, qoqys shyǵarýǵa paıdalanylǵan kólik quraldary men basqa da zattardy tárkileý sııaqty qosymsha sanktsııalar qarastyrylǵan. Bul sharalar qaladaǵy ekologııalyq jaǵdaıdy jaqsartý jáne jańa qoqys úıindileriniń paıda bolýyn boldyrmaýǵa baǵyttalǵan.
Eske sala ketelik, buǵan deıin Aqtóbe qalasynda qoqys alańdaryn tazartýǵa 300 mln teńge jumsalǵanyn jazǵanbyz.
