Astanada 8 jasar jyr perisi Jambyl Dúısenulynyń poezııa keshi ótti

Dál 5 sáýir kúni 8 jasqa tolǵan jyr perisi óz óleńderinde rýh, otansúıgishtik, Otan, til, táýelsizdik taqyryptaryn tolǵaıdy. Nebári 2 jasynda hat tanyp, 4 jasynan uıqas quraǵan bala Jambyldyń qazirde 50-ge jýyq týyndysy bar. Jyr keshinde kishkentaı aqyn jınalǵan jurtqa «Perishte tilek!», «Tilim - taǵdyrym», «Men qazaqpyn», «Bala Jambyl - men bolamyn búgingi», «Mártebeli elim», «Ońaı emes» syndy týyndylaryn oqyp berdi.

«Óleń qulaǵyma uıqasymen kelip sybyrlaıdy»,-degendi aıtady jaýqazyn aqyn. «Halyqtyń balasy bolýǵa tyrysamyn. Armanym - dana Jambyldaı bolý»,-deıdi ol.

J. Dúısenuly Almaty qalasyndaǵy B.Momyshuly atyndaǵy №131 mektep-lıtseıiniń 3-synybynda oqıdy. Qazirdiń ózinde qarshadaı aqynnyń jetken shyǵarmashylyq jetistikteri az emes. Onyń eń alǵashqy jeńisi mektep qabyrǵasynda ótken músháırada boldy. Keıin 7 jasynda-aq Baýyrjan Momyshulynyń 100 jyldyǵyna, Muqaǵalı Maqataevtyń 80 jyldyǵyna arnalǵan baıqaýlardyń bas júldegeri atandy. Mektepte de óziniń bilimdiligimen, zerektigimen kózge túsken Jambyl bir jylda 1,2 synypty bitirip, 3-synypqa kóshken.

Daryn ıesiniń shyǵarmashylyǵyn tamashalaýǵa kelgen elordalyq qaýym mádenıet ortalyǵynyń kontsert zalyn lyq toltyrdy. Sebebi bala Jambyldyń ónerimen astanalyqtar Naýryz meıramynda alǵash ret kórisip, tanysqandary bar.

Kelesheginen úlken úmit kúttiretin jas aqynǵa ataqty qalamger, qoǵam qaıratkeri Myrzataı Joldasbekovtyń ózi qoldaý kórsetti. Onyń aıtýynsha, jas qudyrettiń jyrlarynan qart Jambyldyń uly epıkalyq saryny, Muqaǵalıdiń otanshyldyq asqaq úni estiledi. «Osy balamen birge Jambyl da, Muqaǵalı da qaıta týdy ma degen oıǵa kelemin. Bul bir úlken qubylys»,-dep baǵasyn berdi M. Joldasbekov.