Astanada 8 naýryz qurmetine 6500-den astam kópbalaly anaǵa qarjylaı kómek kórsetildi
ASTANA. 6 naýryz. QazAqparat - 8 naýryz Halyqaralyq áıelder kúni qarsańynda astanalyq 6552 kópbalaly anaǵa bir rettik aqshalaı kómek berildi. Bul týraly Astana qalasynyń Jumyspen qamtý jáne áleýmettik baǵdarlamalar basqarmasyna silteme jasap, astana.kz habarlady.
Tólemaqy «Altyn alqa» jáne «Kúmis alqa» tósbelgilerine ıe kópbalaly analarǵa, tórtten kóp balasy bar kópbalaly otbasylarǵa berildi.
Esterińizge salamyz, mereke men aıtýly kúnderge oraı bir rettik áleýmettik kómek Astana qalasy máslıhatynyń 2010 jylǵy 13 jeltoqsandaǵy № 410/54-IV sheshimimen bekitilgen «Astana qalasyndaǵy muqtaj azamattardyń jekelegen sanattaryna áleýmettik kómek kórsetý erejeleri» negizinde berildi.
Erejelerge sáıkes, astanalyq kópbalaly analarǵa basqa da áleýmettik kómek túrleri kórsetiledi:
- qalalyq qoǵamdyq kólikterde aqysyz júrip-turýǵa (taksıden bólek);
- tisterin tegin protezdeýge (asyl metaldardan jasalǵan protezder esepke alynbaıdy).
Jumyspen qamtý jáne áleýmettik baǵdarlamalar basqarmasynyń málimetine sáıkes, 2012 jyldyń sońyndaǵy esep boıynsha Astanada tórtten kóp balasy bar 3887 otbasy men «Altyn alqa» jáne «Kúmis alqa» tósbelgisine ıe 3478 kópbalaly ana bar.
