Astanada 8 bala terezeden qulaǵan: Ákim sebepterin túsindirdi
ASTANA.QazAqparat - Astanada jyl bastalǵannan beri 8 bala terezeden qulaǵan. Atalǵan oqys oqıǵaǵa baılanysty Saryarqa aýdanynyń ákimi Arman Turlybek «Úıde bala bar, terezeni jap» estafetasyn ótkizýdi usyndy, dep habarlaıdy QazAqparat.
«Kún jylyna bastaǵannan jańalyqtar legi balalardyń terezeden qulap ketý oqys oqıǵalarymen tolyp ketedi. Statıtıstıka kórsetkendeı, balalardyń terezeden qulaý, jaraqattaný, ólimge aparý oqys oqıǵalar sany jyl saıyn óse túsýde, ásirese qalalyq jerlerde. Tek qana 2018 jyldyń basynda Astanada arnaıy derekkózi boıynsha 8 oqys oqıǵa tirkelgen, onyń 2-i ólimmen aıaqtalǵan. Biz buǵan deıin atalmysh oqys oqıǵadan aldyn alý men qajetti sharalardy qabyldaý týraly qanshama ret jazdyq», - deıdi ákim Arman Turlybek Feısbýktegi paraqshasynda.
Sondaı-aq, Arman Turlybek balalardy terezeden qulap ketýinen qorǵaıtyn qaǵıdattardy da usyndy.
«Oqys oqıǵalar kóbinese balalar qaraýsyz qalǵanda oryn alady, sondyqtan balalaryńyzdy jalǵyz qaldyrmańyzdar.
Balalar ońaı minip túsetin jıhazdardy tereze aldynan aýlaq jerge qoıyńyzdar.
Moskıt toryna senimdilik tanytpańyzdar, ol sábılerdi qaýipti oqıǵadan qorǵap qala almaıdy, kerisinshe balanyń qyzyǵýshylyǵyn arttyryp ol terezeden qaraıdy da sonyń arty oqys oqıǵaǵa alyp keledi.
Múmkindiginshe terezeniń astyńǵy emes ústińgi jaǵyn ashyńyzdar, (ústińgi jelkóz). Reti kelse terezeni tolyq ashqannan artqa nemese eki shetinen ashylý mehanızmin qoldanǵan durys.
Terezege balalardyń qoly jetpeıtindeı jerden arnaıy bekitkish qurylǵysyn ornatyńyzdar. Terezege qorǵanys retinde temirden tor ornatyńyzdar. Esterińizde bolsyn, temir torynan balanyń basy syısa, onda ol qorǵanyshtan eshqandaı paıda, qorǵaý múmkindigi joq.
Bekitkish quraldary men terezege temir torlardy tek arnaıy mamandar ornatý kerek. Balalaryńyzdyń qaýipsizdigi úshin eshnárseni únemdemeńizder. Eger tereze aldynda turyp balaǵa syrttan birnárse kórsetip nemese tamashalap tursańyz balaǵa abaı bolyńyz, balany ylǵal qolmen jáne kıiminen ustamańyz.
Osy atalǵan qarapaıym erejeler sizderdiń balalaryńyzdyń qaýipsizdigin qamtamasyz etýge kómektesedi dep úmittenemiz. Ókinishke qaraı, kóptegen ata-analar ashyq turǵan terezeniń bala úshin óte qaýipti ekenine mán bere bermeıdi. Qurmetti ata-analar kishkentaı sábılerińizdi qaraýsyz qaldyrmańyzdar! Olar túrli qaýipterden qorǵaý bizdiń qolymyzdadeıdi ákim.
Avtory: Dáýlet Іztileý
