Astanada 7–8 qarashada soǵym jármeńkesi bolady: qaı óńirler keledi
ASTANA. KAZINFORM — Astanada 7-8 qarasha kúnderi Aqmola, Abaı, Qaraǵandy, Pavlodar jáne basqa da oblystardan kelgen fermerlik sharýashylyqtardyń qatysýymen aýqymdy «Soǵym-FEST» et jármeńkesi bastalady.
Jármeńke aıasynda 1 000 tonnadan astam et ónimin satý josparlanyp otyr.
Soǵym – qazaq halqynyń qysqa daıyndyqpen baılanysty ejelden kele jatqan dástúrleriniń biri.
Ata-babamyz etin qamdap, otbasymen dastarqan basyna jınalyp, jaqyndarymen dám bólisken. Búginde «Soǵym-FEST» osy dástúrdi zamanaýı formatta jalǵastyryp, otandyq fermerler men elorda turǵyndaryn bir alańda toǵystyrady.
Jármeńke qala turǵyndaryna et ónimderin tikeleı óndirýshilerden satyp alýǵa, qysqy maýsymǵa qajetti azyq-túlik qoryn daıyndaýǵa jáne otandyq aýyl sharýashylyǵy taýar óndirýshilerin qoldaýǵa múmkindik beredi.
Jármeńkeler ár demalys kúnderi saǵat 09:00-den 19:00-ge deıin qalanyń úsh alańynda ótedi:
• «Keruen Joly» saýda ortalyǵy – Alash tasjoly, 35B;
• «Et Álemi» saýda ortalyǵy – Alash tasjoly, 31/1;
• «Jurt» saýda ortalyǵy – Beıbarys Sultan kóshesi, 3.
Jármeńke ótetin oryndarǵa qoǵamdyq kólikpen jetýge bolady.
«Keruen Joly» jáne «Et Álemi» saýda ortalyqtaryna №7, 11, 39, 41, 45, 53, 59, 76, 81, 82, 120, 120A, 307 jáne 317 avtobýs baǵyttary qatynaıdy.
«Jurt» saýda ortalyǵyna №2, 7, 13, 32, 42, 49, 50, 67 jáne 73 avtobýs baǵyttary arqyly barýǵa bolady.
Aıta ketelik elimizde soǵym baǵasy qansha ekenin jazǵan edik.
