Astanada 750-ge jýyq ulandyq áskerı ant qabyldady

Respýblıka kúni qarsańynda ótken saltanatty rásim jas jaýyngerler úshin erekshe mánge ıe boldy.

Otan qorǵaýshylar Qazaqstannyń ár óńirinen áskerı qyzmetke shaqyrylǵan. Olar jas jaýynger kýrsynan sátti ótip, áskerı istiń negizderin meńgerip, áskerı jarǵylardyń talaptarymen tanysty. 

Sondaı-aq aldaǵy qyzmettik mindetterin oryndaýǵa qajetti daǵdylardy ıgerdi.

Jas ulandyqtardyń ómirindegi mańyzdy sátke kýá bolý úshin bes myńnan astam adam jınaldy. Olardyń qatarynda ata-analar, týǵan-týystar, dostar, ardagerler men qurmetti qonaqtar boldy.

Bul kún sarbazdardyń otbasy úshin de erekshe boldy. Olar uldarynyń Otan aldyndaǵy boryshyn óteýge kirisip, el qorǵaýshylar qataryna qosylǵanyn tamashalady. 

Áskerı qyzmetshilerge Ulttyq ulan Bas qolbasshysynyń orynbasary general-maıor Bekaıdar Qazkeev aqjarma tilegin arnady. Ol Respýblıka kúni qarsańynda áskerı ant qabyldaýdyń sımvoldyq máni bar ekenin atap ótti. Óıtkeni áskerı boryshqa adaldyq pen azamattardy qorǵaýǵa daıyn bolý elge qyzmet etýdiń mańyzdy bóligi sanalady.

— Áskerı ant qabyldaý arqyly sizder Ulttyq ulannyń qataryna qosylyp, Qazaqstan halqyna adal qyzmet etýge, azamattardyń tynyshtyǵyn qorǵap, qoǵamdyq tártipti saqtaýǵa mindetteme aldyńyzdar. Alda sizderdi tózimdilikti, tártipti jáne qyzmetke jaýapkershilikpen qaraýdy talap etetin mańyzdy kezeń kútip tur. Árqaısyńyz bul joldan abyroımen ótip, bilimińiz ben daǵdylaryńyzdy jetildirip, jaqsy joldastar tabatynyńyzǵa senimdimin, — dedi general-maıor B. Qazkeev.

Ata-analardyń atynan qatardaǵy jaýynger Nurǵısa Erdibaevtyń anasy Zaınur Erdibaeva jas sarbazdarǵa aq tilegin jetkizdi. Ol sarbazdarǵa tózim, qaırat jáne qyzmette tabys tilep, týǵan-týystarynyń olardy úıde árdaıym asyǵa kútetinin eske saldy.

— Búgin sizderdi ómirdiń jańa kezeńine maqtanyshpen shyǵaryp salyp, osyndaı tańdaý jasaǵandaryńyzǵa qýanyp turmyz. Áskerı qyzmet sizderdi shyńdap, jaýapkershilikterińizdi arttyryp, ózderińizge degen senimderińizdi nyǵaıtsyn. Bir-birińizdi qurmettep, qarýlastaryńyzǵa tirek bolyńyzdar. Otan qorǵaýshy degen atqa laıyq qyzmet etińizder. Sizderdi otbasyńyz árdaıym qoldap, senim artyp, úıge aman-esen oralýlaryńyzdy kútip otyrǵanyn umytpańyzdar, — dedi ulandyqtyń anasy.

Saltanatty rásim merzimdi áskerı qyzmetshilerdiń saptyq júrisimen jalǵasty. Jaqyndarynyń aldynda ulandyqtar saptyq júris kezinde áskerı daıyndyǵy men saptaǵy úılesimdiligin kórsetti. 

Odan keıin Ulttyq ulan bólimsheleriniń qarý-jaraǵynda turǵan zamanaýı jaýyngerlik tehnıka júrip ótti. Bul tehnıkalardyń bári áskerı qyzmetshilerdiń qyzmettik-jaýyngerlik mindetterdi oryndaý kezinde qoldanylady. 

Áskerı ant qabyldaǵan jas sarbazdar Astanada qoǵamdyq tártipti kúzetýge kirisedi. Olar quqyq qorǵaý organdarynyń qyzmetkerlerimen birlesip, elorda turǵyndary men qonaqtarynyń qaýipsizdigin qamtamasyz etýge, sondaı-aq qoǵamdyq-saıası, mádenı jáne sporttyq is-sharalar kezinde tártip saqtaýǵa qatysady. 

Buǵan deıin balalardy órtten qutqarǵan áskerı qyzmetshi Ǵazız Baıtasov atyndaǵy medal alǵanyn jazdyq.