Astanada 74 shaqyrymdy quraıtyn velobandar salynady
ASTANA. 30 shilde. QazAqparat - Astanada velosıpedshiler men velosport áýesqoılaryna arnalǵan aýqymdy velobandar salynady. Bul týraly astana.kz saıtyna elordalyq Jolaýshylar kóligi jáne avtomobıl joldary basqarmasynan habarlady.
«2011 jyly 30 shildede №884 Qazaqstan Respýblıkasynyń Úkimetiniń qaýlysymen bekitilgen Astana qalasynyń bas josparyna sáıkes, 2030 jylǵa deıin velobandar salý kózdelgen» delingen aqparatta. Velobandardyń jalpy uzyndyǵy 74 shaqyrymdy quraıdy, sondaı-aq, velosıped joldary, turaq oryndary, oryndyqtar jáne velosıpedterdi jalǵa alý pýnkteri salynady. Budan basqa velosıped joldarynyń jalpy qalalyq mańyzdaǵy magıstral kóshelermen qıylysatyn jerlerde jol ótpesin, baǵdarshamdar jáne pandýstar salý josparlanǵan.
«Velosıped joldarynyń úsh tıpin salý qolǵa alynady. Atap aıtqanda, tek velosıpedshilerge ǵana arnalǵan jeke jol, ortaq qoldanylatyn jol quramyndaǵy beton qorshaýmen nemese belgimen oqshaýlanǵan velosıped joly jáne jaıaý júrginshiler jolynyń quramyndaǵy velojoldar, ol da belgimen nemese jıektermen bólinedi» delingen vedomstvo aqparatynda. Sondaı-aq, velosıpedterdi qaldyrýǵa bolatyn arnaıy oryndar uıymdastyrylady. Eske salaıyq, 2011 jyly Qorǵaljyn tas jolynyń aýmaǵynda 4 shaqyrym velojol salynǵan.
