Astanada 700-den astam avtobýs trappen jabdyqtalǵan
ASTANA. QazAqparat - Astanada «Teń múmkindikter joly» respýblıkalyq aktsııasy ótýde, dep habarlaıdy Astana qalasy ákimdiginiń medıa ortalyǵy.
Astana qalasy ІІD ákimshilik polıtsııa basqarmasynyń, jolaýshylar tasymaly basqarmasynyń jáne Astana qalasy kólikti baqylaý ınspektsııasynyń qyzmetkerleri birlesip múmkindigi shekteýli jandardy otyrǵyzý jáne túsirý fýnktsııasy bar (pandýstar jáne t.b.) avtobýstardyń naqty sanyn anyqtaý maqsatynda reıd júrgizdi.
Aktsııa aıasynda polıtsııa qyzmetkerleri qalalyq baǵdarlarda qyzmet kórsetetin № 1 avtobýs parkinde (Pýshkın kóshesi boıynda) reıd ótkizip, parkke tıesili qoǵamdyq kólikterdiń pandýstarmen qamtamasyz etilýin jáne olardyń jaramdylyǵyn tekserdi.
Búgingi tańda qalaishilik baǵyttar boıynsha 1125 avtobýs qyzmet kórsetedi (sonymen qatar josparly shyǵý 878 birlikti quraıdy), onyń ishinde arbamen júretin múmkindigi shekteýli jandardyń minip túsýine yńǵaıly bolý úshin 729 avtobýs jınalmaly qurylǵymen (trap) jabdyqtalǵan.
