Astanada 7-shi Qysqy Azııa oıyndarynyń bastalýyna qansha kún qalǵanyn keri esepteý tablosy iske qosyldy
STANA. Naýryzdyń 30-y. QazAqparat /Gúlmıra Álıakparova/ - Búgin keshqurym Astanada 2011 jyly ótetin 7-shi Qysqy Azııa oıyndarynyń bastalýyna qansha kún qalǵanyn esepteıtin keri esepteý tablosy saltanatty túrde iske qosyldy,
dep habarlaıdy QazAqparat.
Keri esepteý tablosyn iske qosý saltanaty Astanamen bir mezgilde Almaty qalasynda da ótti. Elimizdiń bas qalasynda tablo «Astana-Arena» jańa fýtbol stadıonynyń alańynda ornatylsa, ońtústik astanada ol Balýan Sholaq atyndaǵy sport saraıynyń aldynda oryn tepti.
Saltanatty rásimge Qazaqstannyń Týrızm jáne sport vıtse-mınıstri Talǵat Ermegııaev, elorda ákimi Imanǵalı Tasmaǵambetov, Azııa Olımpıadalyq keńesiniń (AOK) vıtse-prezıdenti Veı Djıjong, Vankýverdegi qysqy olımpıada oıyndarynyń kúmis júldegeri bıatlonshy Elena Hrýstaleva jáne AOK-ǵa múshe elderdiń 30-ǵa jýyq resmı ókili qatysty.
Keri esepteý tablosy ornatylǵan stela ashylmas buryn, AOK-ǵa múshe barlyq 45 el baıraqtarynyń sherýi ótti.
«Búgin el júregi Astana ǵana emes, tutas halqymyz úshin mańyzy zor, aıtýly kún. Osy sátten bastap kúni erteń elimizdiń tórine enetin 7-shi Qysqy Azııa oıyndarnyń ýaqytyn shamalap, daıyndyǵyn daralaıtyn bolamyz. Azıada halyqaralyq qaýipsizdik júıesinde erekshe oryn alyp, dushpandy dos, dosty týys etetin erekshe doda. Sol dodada bizdiń sportshylarymyz da dańqty aǵa-atalarymyzdyń jolyn qýyp, el mereıin taǵy bir márte asqaqtatatyny sózsiz», - dep atap ótti Astana qalasynyń ákimi.
V.Djıjong bolsa, Qysqy Azııa oıyndaryna Qazaqstannyń daıyndyǵyn joǵary baǵalaıtynyn aıtyp, qazaqstandyq sportshylarǵa bul oıyndarda kóbirek altyn medaldardy enshileýdi tiledi. «Men óz basym Qazaqstan jalpy komandalyq esepte birinshi oryn alatynyna senimdimin», - dep atap ótti ol.
«Qysqy Azııa oıyndarynyń Qazaqstanda ótýi el úshin úlken mártebe. Sebebi bul oıyn sporttyń bir ǵana emes, birneshe túrin qamtıdy. Sondyqtan, uıymdastyrý máseleleri de joǵary deńgeı men jaýaptylyqty qajet etedi. Óz tarapymnan bul oıyndarda bar kúsh-jigerimdi salýǵa daıynmyn», - deıdi bıatlonshy qyz E. Hrýstaleva.
Stelany oıyn aıaqtalǵan soń da saqtaý josparlanyp otyr. Bul Qazaqstanda halyqaralyq dárejedegi tuńǵysh ret ótken iri sporttyq forým - Aq Azıada týraly estelik bolyp qalmaq.
Aıta keteıik, 7-shi Qysqy Azııa oıyndary Astana men Almaty qalalarynda 2011 jylǵy qańtardyń 30-y men aqpannyń 6-sy aralyǵynda ótedi. Onda sporttyń 11 túrinen barlyǵy 69 medal sarapqa salynady. Jarysqa barlyǵy 2 myńǵa jýyq sportshy qatysady dep kútilýde. Búginnen bastap Azııa oıyndarynyń bastalýyna 306 kún qaldy.
