Astanada 7-shi qysqy Azııa oıyndary Alaý estafetasyna daıyndyq jattyǵýlary ótti

Qysqy Azııa oıyndaryn jáne Alaý estafetasyn ótkizý jónindegi Astana qalalyq dırektsııanyń uıytqy bolýymen óńirlik shtabtardyń ókilderi elordada bas qosyp, «Astana-Arena» stadıony mańynda daıyndyq estafetasyn ótkizdi. Eske salaıyq, Qazaqstanda, jalpy qysqy Azııa oıyndarynyń tarıhynda alǵash uıymdastyrylǵaly otyrǵan Alaý estafetasy elimizdiń barlyq óńirlerin qamtıtyn bolady. 2008 jyly elimizde Beıjiń olımpıadalyq oıyndary estafetasynyń kezeńi ótkeni belgili. Biraq ol birkúndik shara boldy. Tolyqqandy estafeta TMD aýmaǵynda buryn-sońdy ótkizilmegen. Sondyqtan barsha el kóz tigip otyrǵan sharany asa joǵary deńgeıde uıymdastyrý memleketimiz úshin - abyroıly mindet, zor jaýapkershilik. Sol sebepti de estafetaǵa daıyndyq jáne alaýgerlerdi irikteý jumystaryn júrgizý úshin barlyq aımaqtarda oblys ákimderiniń tóraǵalyq etýimen óńirlik shtabtar qurylǵan bolatyn.

«Jalpy alǵanda estafetany uıymdastyrýdyń negizgi máseleleri sheshildi. Óńirlik shtabtardyń mamandary biz ázirlegen usynymdar boıynsha egjeı-tegjeıli jumystar jasap jatyr. Búgingi mindetimiz qordalanǵan teorııalyq suraqtarǵa is júzinde jaýap berý», - deıdi Astanalyq Dırektsııanyń basshysy Naıl Nurov.

N.Nurov atap kórsetkendeı, óńirlik shtabtar alaýgerlerdi aldyn ala irikteý jumysyna asqan jaýapkershilikpen qarap, Dırektsııalar men Halyqaralyq Olımpıada komıtetiniń talaptaryn barynsha oryndady. Endigi kezek alaýgerlerdiń tizimin bekitetin respýblıkalyq komıssııanyń enshisinde. Tizimder bekitilgennen keıin árbir alaýgerge onyń estafetadaǵy ornyn kórsetetin jeke nómir beriledi. Al jeltoqsan aıynyń sońynda olar Azıadanyń logotıpteri bar nysandy kıimder alady.

Onyń aıtýynsha, alaýgerlerge eń bastysy - asyqpaý qajet. Árbir alaýgerge alaý qutysyn (fakeldi) qabyldap alǵannan keıin burylyp, ony estafetany tamashalaýshy jurtqa, sýretke túsirýshi týys-týǵandary men búkil elge kórsetýge jetkilikti ýaqyt beriledi. Eń bastysy bul sátte - óz-ózin erkin ustaý. Sebebi, synamalyq estafetanyń ózinde alaýgerlerdiń rólinde bolǵan eriktiler bul erkindikti tanyta almady. Daıyndyǵy joq adamǵa sasqalaqtaý qalypty jaǵdaı ekendigin aıtqan N.Nurov, Beıjiń estafetasynyń Almatyda ótken kezeńinde alaý alyp júrýshiniń elge, álemge tanymal «juldyz» bolǵandyǵyna qaramastan, olardyń qatty abyrjyǵandaryn eske aldy. Osy rette, óńirlik shtabtardyń basshylary Estafeta aldynda alaýgerler úshin oqý-jattyǵýlardy ótkizý máselesin kóterdi.

Synamalyq estafeta barasynda, sondaı-aq, Alaý estafetasy men oıyndardyń ajyramas nysandary - fakel men tasymaldanbaly ottyq tanystyryldy.

Buǵan deıin habarlaǵanymyzdaı, fakeldiń dızaıny Almaty mańynda tabylǵan, bizdiń jyl sanaýymyzǵa deıingi ІІІ-І ǵ. jatatyn saqtardyń jaryqtandyrǵysh quraly negizinde jasaldy. Túrli-tústi metalldan quıylǵan alaý qutynyń syrty kúmis jáne altyn tústi boıaýlarmen kómkerilgen. Fakel uzaqtyǵy 1 saǵatqa deıin jetetin gaz ballonynyń kómegimen janady. Fakeldiń uzyndyǵy - 65-66 santımetr, salmaǵy 1,700 gramm. Bul asa kóp salmaq bolmaǵanymen ony abyroımen jáne barynsha ádemi alyp ótý kerek. Sol sebepti estafetanyń óńirlerdegi kezeńderin uıymdastyrýshylarǵa balalar men egde adamdardyń júgirip ótýi tıis mejesin qysqartý tapsyrmasy qoıyldy.