Astanada 7 myńnan astam stýdent suranysqa ıe emes mamandyqtarda oqytylýda - elorda ákimdigi
ASTANA. QazAqparat - Qazirgi kezde Astanadaǵy joǵary oqý oryndarynda 7 myńnan astam stýdent eńbek naryǵynda suranysqa ıe emes mamandyqtarda oqytylýda. Bul týraly búgin jumyspen qamtý máselesi boıynsha Astana forýmynda qala ákiminiń orynbasary Aıda Balaeva málim etti.
«Ókinishke qaraı, búginde bizdiń saraptamalyq málimetterge sáıkes, 5-7 myńnan astam stýdent eńbek naryǵynda suranysqa ıe emes mamandyqtar boıynsha oqytylýda. Bul ahýal óńirlerden kóshi-qonnyń esebinen tereńdeı túsýi múmkin. Sebebi, óńirdegi jastar Astanaǵa kóshýge talpynyp, osynda jumysqa ornalasyp, óziniń ómirin elordamen baılanystyrǵysy keledi», - dedi ákimniń orynbasary.
Onyń sózine qaraǵanda, aıryqsha profıtsıtti mamandyqtar retinde zańgerlik jáne ekonomıkalyq kásipter tirkelýde. Qazirgi kezde 10 myńnan astam jastar dál osy mamandyqtar boıynsha jumys taba almaı júr.
«Eger qazirden bastap joǵary oqý oryndarynda fakýltetter ońtaılandyrylmasa, onda bul kórsetkish jyl saıyn arta túsedi. Osy oraıda búginde Bilim jáne ǵylym mınıstrligi tarapynan bastalǵan jumystar qýantyp otyr», - dedi A. Balaeva.
Onyń sózine qaraǵanda, elordada kásibı beıimdelý jumystary kúsheıtilgen túrde júrgizilýde. «Búginde memlekettik qurylys-tehnıkalyq kolledji bazasynda resýrstyq tehnologııalyq ortalyq qurylýda. Osy ortalyqta biz sabaqtas eki nemese odan da kóp mamandyqty ıgeretin ámbebaptardy daıarlaýdy josparlaýdamyz. Bul jumystar ári qaraı jalǵasyn tabady», - dedi ol.
