Astanada 7 maýsym kúni ótetin Respýblıkalyq báıge jarysynyń bastalý ýaqyty ózgerdi
ASTANA. KAZINFORM - Elorda mańyndaǵy «Qazanat» atshabarynda 7 maýsymǵa belgilengen Qazaqstan Memlekettik rámizder kúnine oraı uıymdastyrylatyn aýqymdy respýblıkalyq báıge jarysynyń bastalý ýaqyty ózgerdi, dep jazdy qala ákimdiginiń resmı saıty.
Dúbirli dodanyń saltanatty ashylýy 7 maýsym kúni keshki saǵat 17:00-de ótedi. Ashylý rásiminen keıin báıge jarystary kezeń-kezeńimen jalǵasady.
Báıge jarysynyń bas tóreshisi Nurlybek Muhamedııarovtyń aıtýynsha, ýaqyttyń ózgerýi aýa raıynyń kúrt ysýyna baılanysty qabyldanǵan. –
– Ulttyq rýhty asqaqtatatyn dúbirli báıgeniń ashylý saltanatyn 7 maýsym kúni saǵat 17:00-ge aýystyrdyq. Bul sheshim at ıeleri men uıymdastyrýshylardyń kelisimi negizinde qabyldandy. Sebebi sol kúni aýa temperatýrasy +35…+38 gradýsqa deıin kóteriledi dep boljanyp otyr. Biz úshin eń bastysy – shabandozdardyń, sáıgúlikterdiń jáne kórermenderdiń qaýipsizdigi men jaılylyǵyn qamtamasyz etý. Elorda turǵyndary men qala qonaqtaryn ulttyq sport merekesine qatysyp, qazaq halqynyń tól murasy – báıgeniń qyzyǵyn tamashalaýǵa shaqyramyz, – dedi ol.
Saryarqanyń saıyn dalasyn dúbirge bóleıtin jarysta elimizdiń túkpir-túkpirinen kelgen tańdaýly tulparlar men tájirıbeli shabandozdar úsh qashyqtyq boıynsha baq synaıdy. 9 shaqyrymdyq «Qunan» báıge, 16 shaqyrymdyq «Top» báıge jáne 25 shaqyrymdyq «Alaman» báıge boıynsha oza shapqan jeńimpazdar men júldegerlerge aqshalaı syıaqylarmen qatar 1 bólmeli páter jáne eki birdeı «Changan» avtokóligi tabystalady. Uıymdastyrýshylardyń málimetinshe, júırik tulparlar men shabandozdardy tirkeý onlaın formatta júrgizilip jatyr. Al oflaın tirkeý 6 maýsym kúni «Qazanat» atshabarynda saǵat 09:00-den 18:00-ge deıin ótedi.
Qatysý jarnalary:
• «Alaman» báıge – 70 myń teńge;
• «Top» báıge – 50 myń teńge;
• «Qunan» báıge – 30 myń teńge.
Jınalǵan qarajat tolyqtaı qaıyrymdylyq maqsattarǵa jumsalady. Merekelik báıge jarysyna kórermender úshin kirý tegin.
«Qazanat» atshabaryna LRT jelisi arqyly, sondaı-aq №37, 42, 302, 303, 320, 323 jáne 501 qoǵamdyq kólikterimen jetýge bolady.
Aıta keteıik, respýblıkalyq báıge jarysy Astana qalasy ákimdiginiń qoldaýymen, Respýblıkalyq báıge federatsııasy, Ulttyq jáne olımpıadalyq at sporty túrleri federatsııasy, «NAK» qurylys kompanııasy jáne qalalyq sport basqarmasynyń uıymdastyrýymen ótedi.
Aıta keteıik, Májiliste kókparǵa arnalǵan qaýipsizdik standartyn zańnamalyq deńgeıde bekitý usynyldy.
