Astanada 7-qysqy Azııa oıyndary barysynda 400-den astam adamǵa medıtsınalyq kómek kórsetildi

Bul týraly búgin elordalyq Densaýlyq saqtaý basqarmasynyń keńeıtilgen alqa májilisinen keıin jýrnalısterge bergen suhbatynda Basqarma bastyǵy Dáýlethan Esimov aıtty.

D.Esimovtiń aıtýynsha, Azııa oıyndary kezinde qaladaǵy medıtsınalyq uıymdar men jedel medıtsınalyq járdem stansysynyń kómegine júgingenderdiń basym deni sportshylar, olardyń kómekshileri men oıyndarǵa arnaıy shaqyrylǵan qonaqtar boldy.

«Negizinen naýqastarda jedel respıratorlyq juqpalar men jaraqattanýlar boldy. Biraq sporttyq jaraqattar bolǵan joq. Statsıonarǵa jatqyzylǵan eki naýqastyń bireýinde júrek qaǵysy nasharlaǵan bolsa, ekinshisi soqyrishek kúdigimen tústi. Medıtsınalyq mamandardyń qaraýyna jatqyzylǵan naýqastar - qazaqstandyq jáne reseılik azamattar», - dep naqtylady Basqarma bastyǵy.

D.Esimovtyń aıtýynsha, Azııa oıyndary barysynda qala qorynan jumsalǵan medıtsınalyq preparattardyń ornyn toltyrý maqsatynda jáne maýsymdyq tumaý men jedel respıratorlyq juqpanyń kezekti tolqynyna daıar bolý úshin, qala bıýdjetiniń rezervinen qosymsha qarajattar bólinetin bolady.