Astanada 7-Qysqy Azııa oıyndary Alaý estafetasynyń alaýgerine alǵashqy sertıfıkat tapsyryldy
ASTANA. 28 jeltoqsan. QazAqparat /Gúlmıra Álıakparova/ - Búgin Astanada 7- Qysqy Azııa oıyndarynyń Alaý estafetasyna qatysý úshin alǵashqy sertıfıkatty tapsyrý is-sharasy ótti.
Sertıfıkatqa ıe bolǵan alǵashqy alaýger - Grekııa Respýblıkasynyń Qazaqstan Respýblıkasyndaǵy Tótenshe jáne ókiletti elshisi Evagelos Denaksas boldy.
Sertıfıkatty Qysqy Azııa oıyndary men Alaý estafetasyn ótkizý jónindegi Astana qalalyq dırektsııasynyń basshysy Naıl Nýrov tapsyrdy. «Grekııa -Olımpıada qozǵalysynyń otany. Atalmysh eldiń dıplomattary álemde kóne grekııalyq olımpıada dástúrin qaıta jandandyrýǵa talpynýda. E. Denaksastyń estafetaǵa qatysýy Olımpıadalyq jáne Azııalyq oıyndar ózara tyǵyz baılanysty ekendigin taǵy bir márte eske salatyn bolady», - dedi ol.
Kezdesý barysynda sondaı-aq Elshige Alaý estafetasynyń atrıbýttary, atap aıtqanda alaý qutysy, tasymaldanbaly ottyq, kishi qazandyq, alaýgerler men alaý saqshylarynyń kıim úlgileri tanystyryldy. Onymen birge, estafetanyń Elshi qatysatyn elordadaǵy baǵyty áńgime arqaýy boldy.
Aıta keteıik, Azıada Alaýy 11 qańtar kúni AOK-nyń shtab-páteri ornalasqan Ál-Kýáıt qalasyndaǵy «Kýveıt Taýers» munaralarynyń aldyndaǵy alańda tutanady. 12 qańtar kúni Alaý Almaty qalasyna jetkiziledi de, ol 20 kún boıy Qazaqstannyń ortalyq aımaqtaryn aralaıdy. 30 qańtar kúni estafetanyń Astanadaǵy kezeńi ótedi. Іs-shara osy kúni Oıyndardyń saltanatty ashylý rásimi bolatyn «Astana-Arena» stadıonynda márege jetedi. Alaý estafetasyna respýblıka boıynsha barlyǵy 1020 alaýger iriktep alyndy, ár oblystan - 60, Almatydan - 80 jáne Astanadan - 100 adam.
