Astanada 7 kóshege Bus Lane jolaqtary engiziledi
ASTANA. KAZINFORM – Astanada 15 maýsymnan 16 maýsymǵa qaraǵan túni Sh.Aıtmatov kóshesinde Bus Lane qoǵamdyq kóligi úshin bólingen jolaq engiziledi. Ol Sh.Qosshyǵululy kóshesinen J.Moldaǵalıev kóshesine deıingi ýchaskeni qamtıdy, jalpy uzyndyǵy 10,5 km bolady. Bul týraly elorda ákimdiginiń resmı saıty jazdy.
Qazirgi ýaqytta kórsetilgen ýchaskede jolaqtardy syzý jumystary júrgizilip jatyr.
«Bul — osy jyly 7 ýchaskede engiziletin Bus Lane jolaqtardyń alǵashqysy. Buǵan deıin habarlaǵandaı, bólingen jolaqtar Máńgilik el, Turan, Táýelsizdik dańǵyldary men Kereı Jánibek handar kóshesine, Uly Dala jáne R.Qoshqarbaev dańǵyldaryna engiziledi», — delingen habarlamada.
Bus Lane qoǵamdyq kólikter qozǵalysynyń jol júrý ýaqytyn, aralyqty, aıaldamalarda jolaýshylardyń avtobýstardy kútý ýaqytyn qysqartýǵa, ortasha paıdalaný jyldamdyǵyn arttyrýǵa yqpal etedi.Sondaı-aq jedel járdem qyzmeti, arnaıy qyzmetter men órt sóndirý kólikteriniń kedergisiz qozǵalysyn qamtamasyz etýge múmkindik beredi.
