Astanada 69 kópqabatty turǵyn úıge kúrdeli jóndeý júrgizildi
ASTANA. KAZINFORM – Astanada 2022-2024 jyldarǵa arnalǵan memlekettik baǵdarlama boıynsha 69 kópqabatty turǵyn úıge kúrdeli jóndeý júrgizildi. Bul týraly elorda ákimdiginiń resmı saıty habarlady.
Sonymen qatar, osy kezeńde 55 ǵımarattyń lıftileri jóndeldi nemese aýystyryldy.
— Ortaq múlikti kúrdeli jóndeý jumystary eki túrge bólinedi — mınımaldy jáne maksımaldy jumys túrleri. Jumystyń mınımaldy túri jylý tutynýdy retteýdiń avtomattandyrylǵan júıesin jáne úıdegi jylý energııasyn jalpy eseptegishterdi ornatý arqyly turǵyn úıdiń shatyryn, kireberisin jáne jertólesin jóndeýdi, sondaı-aq ǵımarattyń tehnıkalyq múmkindikterin eskere otyryp, qozǵalysy shekteýli jandar úshin qoljetimdi ortany qurýdy qamtıdy. Jumystyń maksımaldy túri shatyrdy, kireberisti, jertóleni, qasbetti jóndeý, jylý tutynýdy retteýdiń avtomattandyrylǵan júıesin jáne jalpy úıdegi jylý eseptegish quraldaryn mindetti túrde ornatý arqyly lıft jabdyǵyn jóndeý (aýystyrý), turǵyn úılerdiń jalpy ınjenerlik jelilerin jáne órt qaýipsizdigi júıelerin ornatý/qaıta jabdyqtaý, sondaı-aq ǵımarattyń tehnıkalyq múmkindikterin eskere otyryp, qoljetimdi ortany qurý bolyp sanalady, — dedi «Órken qala» JShS dırektorynyń orynbasary Gýlvıra Abetova.
Kondomınıým obektisiniń ortaq múlkin kúrdeli jóndeýge, lıftilerdi memlekettik bıýdjettik kredıt esebinen jóndeýge (aýystyrýǵa) qatysý týraly sheshimdi kóppáterli turǵyn úıdegi páterler men turǵyn emes úı-jaılardyń menshik ıeleri jalpy jınalysta qabyldaýǵa tıis.
Onda baǵdarlamaǵa qatysý faktisi ǵana emes, sonymen qatar ár páterge, turǵyn emes úı-jaıǵa júktelgen shyǵyndar somasy bekitilýi kerek. Ol barlyq turǵyn jáne turǵyn emes úı-jaılardyń alańdarynyń mólsherine baılanysty aıqyndalady.
Sonymen qatar, jalpy jınalysta páterler men turǵyn emes úı-jaılardyń ıeleri bıýdjet qarajatyn qaıtarý merzimin anyqtaýy tıis. Erejege sáıkes, ol 7 jyldan 15 jylǵa deıin bolýy múmkin. Sondaı-aq, jasyryn jumys túrlerin qosa alǵanda, jumystardy qabyldaý kezinde shyǵyndardyń, qyzmet kórsetýshiler men jaýapty tulǵalardyń smetasy da bar.
— Astanada kúrdeli jóndeý jumystary jalǵasýda. Turǵyndar atalmysh baǵdarlamanyń operatory bolyp sanalatyn «Órken qala» JShS-ge habarlasyp, ótinim bere alady, — dep atap ótti Abetova.
Aıta keteıik, Astanada 2011 jyldan beri jergilikti bıýdjet qarajaty esebinen turǵyn úılerdi kúrdeli jóndeý boıynsha memlekettik baǵdarlama jumys isteıdi. Jóndeýdi qajet etetin kez kelgen kópqabatty úı osy maqsatta bıýdjettik nesıe alýǵa ótinish bere alady.
Buǵan deıin habarlanǵandaı, jyl basynan beri qansha turǵyn úı alańy paıdalanýǵa berilgeni aıtyldy.