Astanada - 684 myń, Almatyda - 1 mln. 404 myń adam turady
ASTANA. Sáýirdiń 30-y. QazAqparat /Ernur Aqanbaı/ - Sońǵy júrgizilgen Halyq sanaǵynyń qorytyndysy boıynsha, Qazaqstannyń iri qalalaryndaǵy halyq sanynyń óskeni baıqalyp otyr. Bul týraly búgin bnews.kz portalynda ótken online-konferentsııada QR Statıstıka agenttiginiń tóraǵasy Álıhan Smaıylov aıtty,
dep habarlaıdy QazAqparat.
Á. Smaıylovtyń sózine qaraǵanda, Qazaqstannyń iri qalalaryndaǵy halyqtyń sany sanaqtyń túpkilikti qorytyndysy anyqtalǵan kezde belgili bolady. Deıturǵanmen, Agenttikte halyq sany jóninde aǵymdaǵy eseptiń, aǵymdaǵy statıstıkanyń derekteri bar. 2009 jylǵy sanaqtyń qorytyndysy boıynsha, halyqtyń sany jónindegi derekter aǵymdaǵy eseppen 1 paıyz sheginde ajyratylady. Sondyqtan, qandaı da bir eldi mekendegi halyq sany jaıly aıtqanda, aǵymdaǵy eseptiń derekteri aıtarlyqtaı shynaıy bolyp shyǵady.
Á. Smaıylov 1999 jylmen salystyrǵanda elimizdiń kóptegen qalalarynda halyq sanynyń óskenin atap ótti. «1999 jylmen salystyrǵanda Astana qalasy halqynyń sany 2 eseden astamǵa ósip, 2010 jyldyń basynda aǵymdaǵy statıstıka boıynsha 684 myń adamdy qurady. Halyq sanaǵynyń kezekti qorytyndysy alynǵannan keıin bul san áli de naqtylanatyn bolady. Osy jyldyń basynda Almaty qalasyndaǵy halyqtyń sany 1 mln. 404 myń adamdy qurady jáne 1999 jylmen salystyrǵanda 24 paıyzǵa ósti», dedi Agenttik tóraǵasy.
Onyń sózine qaraǵanda, sondaı-aq Taldyqorǵandaǵy halyq sany - 22 paıyzǵa, Atyraýda - 19 paıyzǵa, Oralda - 12 paıyzǵa, Shymkentte - 38 paıyzǵa ósken. Á. Smaıylov sonymen bir mezgilde Qostanaı, Petropavl, Óskemen qalalarynda halyqtyń sany birshama azaıǵanyn jetkizdi. «Bul eń aldymen atalmysh qalalardaǵy halyqtyń qurylymymen, ulttyq quramymen baılanysty. Halyqtyń bir bóligi, sonyń ishinde slavıan ulty, nemister ózderiniń tarıhı otanyna qaıtýyn jalǵastyrýda. Al, jalpy Qazaqstan boıynsha 2004 jyldan bastap syrtqy kóshi-qonnyń oń saldosy baıqalýda. Elimizden ketip jatqandardyń sanynan, kelip jatqandardyń sany kóp», dedi ol.
Á. Smaıylovtyń aıtýynsha, tutastaı alǵanda, Halyq sanaǵynyń derekterin eskergende 2010 jyldyń basynda Qazaqstan halqynyń sany - 16, 2 mln. adamǵa baǵalanyp otyr.
