Astanada 67 eldiń balýany bas qosady: kýrashtan álem chempıonaty ótedi

ASTANA. KAZINFORM — 7–9 qarasha kúnderi Astanada kýrash kúresinen eresekter arasyndaǵy XV álem chempıonaty ótedi. Qazaqstanda alǵash ret uıymdastyrylatyn halyqaralyq dodaǵa 67 elden 400-ge jýyq sportshy qatysady. Bul týraly Astana qalasynyń ákimdigi habarlady.

Astanada 67 eldiń balýany bas qosady: kýrashtan álem chempıonaty ótedi
Foto: Astana qalasynyń ákimdigi

Álem chempıonatynyń saltanatty ashylý rásimi 7 qarasha kúni saǵat 17:00–de Jaqsylyq Úshkempirov atyndaǵy Jekpe-jek saraıynda ótedi.

Baıraqty básekege álemniń 67 elinen 400-ge jýyq sportshy, sondaı-aq jattyqtyrýshylar, tóreshiler, sport salasynyń mamandary men halyqaralyq sport uıymdarynyń ókilderi qatysady.

Qatysýshy memleketter sany boıynsha bul kýrash kúresinen álem chempıonattarynyń tarıhyndaǵy rekordtyq kórsetkish bolmaq. Buǵan deıingi rekord 2022 jyly Úndistannyń Pýna qalasynda ótken XIII álem chempıonatynda tirkelgen. Atalǵan dodaǵa 60 eldiń ókilderi qatysqan.

Álem chempıonatynyń negizgi beldesýleri 7-9 qarasha aralyǵynda Jaqsylyq Úshkempirov atyndaǵy Jekpe-jek saraıynda ótedi. Jarystar kún saıyn saǵat 10:00–de bastalady.

Astanada 67 eldiń balýany bas qosady: kýrashtan álem chempıonaty ótedi
Foto: Astana qalasynyń ákimdigi

Sportshylar erler men áıelder arasynda 16 salmaq dárejesi boıynsha synǵa túsedi.
Erler arasyndaǵy salmaq dárejeleri: 60 kg, 66 kg, 73 kg, 81 kg, 90 kg, 100 kg, 120 kg jáne 120 kg-nan joǵary.

Áıelder arasyndaǵy salmaq dárejeleri: 48 kg, 52 kg, 57 kg, 63 kg, 70 kg, 78 kg, 87 kg jáne 87 kg-nan joǵary.

Bozkilemde álemniń úzdik kýrash balýandary, onyń ishinde álem jáne Azııa chempıondary, Azııa oıyndarynyń jeńimpazdary ózara myqtyny anyqtaıdy.

Kýrash — Ortalyq Azııa halyqtarynyń tarıhı-mádenı murasymen tyǵyz baılanysty ulttyq sport túrleriniń biri. Búginde bul sport túri halyqaralyq deńgeıde keńinen tanylyp, álemniń kóptegen elinde qarqyndy damyp keledi.