Astanada 6 jylda 15 oqýshylar saraıy ashylady
Astana qalasynda 2024 jyly 25 mekteptiń qurylysy josparlanyp otyr. Onyń 15-i «Jaıly mektep» ulttyq jobasy aıasynda salynady. Bul týraly elorda ákimi Jeńis Qasymbek eseptik kezdesýinde aıtyp berdi, dep habarlaıdy Kazinform.
«Astanadaǵy bilim berý júıesi ásirese jańa qurylys aýdandarynda mektepter men balabaqshalardaǵy oryn tapshylyǵyna ushyrady. Máseleni sheshý úshin bıyl 7 mektep paıdalanýǵa berildi, taǵy 5 mekteptiń qurylysy aıaqtalyp keledi», - dedi ákim Ortalyq kommýnıkatsııalar qyzmetinde ótken baspasóz máslıhatynda.
2024 jyly qalada 25 mekteptiń qurylysy josparlanǵan, onyń ishinde 3 jekemenshik, 7 memlekettik jáne «Jaıly mektep» jobasy boıynsha 15 nysan salynady.
Jalpy «Jaıly mektep» jobasy boıynsha 90 myń oqýshyǵa arnalǵan 24 mektep salynady. Onyń 15-i qarqyndy damyp kele jatqan Esil jáne Nura aýdandarynda ornalasady. Osylaısha, 2028 jylǵa deıin eki aýysymda 200 myńǵa jýyq orynǵa arnalǵan 80-nen astam mektep salý kózdelip otyr.
«2029 jylǵa deıin jergilikti bıýdjet jáne memlekettik-jekeshelik áriptestik tetigin qoldana otyryp, 15 zamanaýı oqýshylar saraıyn salýdy josparlap otyrmyz. Eń alǵashqysy Turan dańǵylynda ornalasqan «Sana» oqýshylar saraıy osy jyly paıdalanýǵa berildi. Kelesi jyldyń birinshi toqsanynda qalanyń ár aýdanynda bes oqýshylar saraıynyń qurylysyn bastaımyz», - dep tolyqtyrdy Jeńis Qasymbek.
Sondaı-aq, ınvestorlar qarajatyna 16 jekemenshik balabaqsha salynýda, 2029 jylǵa deıin 60 memlekettik balabaqsha salý josparlanǵan. Birinshi kezeńde 2025 jyly jergilikti bıýdjet pen memlekettik-jeke áriptestik qarajatyna 10 balabaqsha salý josparlanýda.
