Astanada 6 oqýshy aǵylshyn tilinde UBT tapsyrady

ASTANA. QazAqparat - Astana mektepteriniń 6 túlegi Ulttyq biryńǵaı testti aǵylshyn tilinde tapsyrady, dep habarlaıdy QazAqparat tilshisi qalalyq bilim basqarmasyna silteme jasap.

«Bıyl Astanada 5 870 oqýshy mektep bitiredi. Olardyń 90 protsenti - 5 329 oqýshy Ulttyq biryńǵaı testileýge qatysady. Onyń ishinde, 3 293 oqýshy qazaq tilinde, 2030 - orys tilinde jáne 6 oqýshy - aǵylshyn tilinde tapsyrady», - delingen qalalyq bilim basqarmasynyń habarlamasynda.

Atap aıtqanda, aǵylshyn tilindegi synaqtan Spektrým mektebiniń 3 túlegi jáne №8, 4 jáne 77 mektep oqýshylary ótedi.

«Sonymen birge, UBT Astanadaǵy 3 ýnıversıtet bazasynda uıymdastyrylady. Olar: L.Gýmılev atyndaǵy Eýrazııa ulttyq ýnıversıteti, S.Seıfýllın atyndaǵy Qazaq agrotehnıkalyq ýnıversıteti jáne Qazaq ekonomıka, qarjy jáne halyqaralyq saýda ýnıversıteti. UBT ótkizý oryndarynda onlaın kórsetilim qyzmetimen qamtamasyz etilgen», - dep habarlady mekeme.

Aıta keteıik, Astana qalasynda UBT 2018 jyldyń 20 maýsynan 1 shildege deıin ótedi. Ótkizý ýaqyty: saǵat 9.00-den 12.30-ǵa deıin.

Eske sala ketsek, Astananyń bilim basqarmasy qorshaǵan ortany qorǵaý maqsatynda jalpy bilim berý mektepterinen áýe sharlaryn ushyrmaýdy talap etti.