Astanada 6 naýqasty aldap, 4 mln teńgeni qoldy etken dáriger sottaldy

ASTANA. KAZINFORM — 6 naýqasqa múgedektik rásimdeýge kómektesemin dep aldap ketken klınıka dárigerine qatysty úkim shyǵaryldy, dep habarlaıdy Astana qalasynyń prokýratýrasy.

Vedomstvo dereginshe, alaıaq-dáriger óziniń qyzmetin jumys ornynda usynǵan, alaıda shyn máninde mundaı kómek kórsetýge quqyǵy bolmaǵan.

— Aldaý arqyly alǵan 4 mln teńgeden astam aqshalaı qarajatyn ol jeke qajettilikterine jumsaǵan. Prokýror usynǵan dáleldemelermen aıyptalýshynyń kinási tolyq dáleldendi, qylmystyq quqyq buzýshylyqtar jıyntyǵyn eskere otyryp ol bas bostandyǵynan aıyrý jazasyna sottaldy. Materıaldyq shyǵyn óndirildi. Úkim zańdy kúshine endi, — dep atap ótti qalalyq prokýratýra.

Qala prokýratýrasy áleýmettik qyzmetterdi alý úshin tek ýákiletti organdarǵa resmı ótinishpen júginý qajet ekendigin nazarǵa salady.

Buǵan deıin Ulttyq neırohırýrgııa ortalyǵy otaǵa muqtaj sottalýshyny jatqyzýdan bas tartqanyn jazǵan edik.