Astanada 6 kólikti aıdap áketken ákki ury ustaldy

ASTANA. QazAqparat - «Saryarqa» aýdanynyń polıtseıleri jedel-izdestirý barysynda avtokólik aıdap áketýdi kásip etken 28 jastaǵy jigitti ustady, dep habarlaıdy elordalyq Polıtsııa departamentiniń baspasóz qyzmeti.

Polıtseıler astanalyq azamattyń eki kún ishinde negizinde «Volksvagen Passat» jáne «Audi» markaly 6 avtokólikti aıdap áketkenin anyqtady. Beınekameralardyń arqasynda polıtsııa qyzmetkerleri kúdiktiniń izine túsip, ony ustap aldy.

Ustalǵan azamattyń aıtýynsha, urlyq jasaǵan kezde onda «Volksvagen Passat» avtokóliginiń kiltteri bolǵan, sol arqyly ol joǵaryda atalǵan kólik markasy men «Audi» markaly avtokólikterin ashyp, ot aldyra alǵan. Kúdikti urlyq jasap, qajetti jerine jetkennen soń, kólikti kóshede qaldyryp ketken.

Qazirgi ýaqytta aıdap áketý faktisine qatysty QR QK 200-baby boıynsha sotqa deıingi tergeý amaldary júrgizilýde, kúdikti PD Ýaqytsha ustaý ızolıatoryna qamaldy. Er adamnyń zańdy birinshi ret buzbaǵany anyqtaldy. 2014 jyly ol urlyq jasaǵany úshin sottalǵan. Onyń elorda aýmaǵynda jasalǵan basqa da osyǵan uqsas qylmystarǵa qatystylyǵy tekserilýde.