Astanada 6 qarjy pıramıdasynyń qyzmeti toqtatyldy
ASTANA. KAZINFORM — Búginde kóleńkeli ekonomıkanyń keń taralǵan túrleriniń biri — azamattarǵa mıllıondaǵan teńge kóleminde shyǵyn keltiretin qarjy pıramıdalary. Ádette, qarjy pıramıdalaryna ońaı oljaǵa kenelýdi kózdeıtin ártúrli jastaǵy azamattar tartylady.
Bul týraly Astana qalasy prokýrorynyń kómekshisi Aslan Mádı málimdedi.
— Jyl basynan beri qala aýmaǵynda alty qarjy pıramıdasynyń «WYP.KZ», «Sinsera Systems», «Life is Good», «Sirius Energy», «World Business Consulting», «Buyers Union» qyzmeti toqtatyldy, — dedi ol Astana qalasynyń Kommýnıkatsııalar qyzmetinde ótken brıfıngte.
Sonymen qatar ol qazirgi ýaqytta Astana qalasy boıynsha Ekonomıkalyq tergep-tekserý departamenti «WYP.KZ» ınternet-dúkenine qatysty qylmystyq isti tergep jatqanyn aıtty.
Alaıaqtyqtyń negizgi tásili — «iPhone» markaly uıaly telefondar men basqa da túrli tehnıkany naryqtaǵy baǵadan tómen satý bolǵan. Alaıda uıymdastyrýshylar taýarlardy naryqtaǵy naqty baǵasymen satyp alǵan.
— Jańadan kelgen satyp alýshylardan túsken qarajat burynǵy klıentter aldyndaǵy mindettemelerdi oryndaýǵa jumsalǵan. Alaıda tapsyrystar sanynyń artýy men aınalym qarajatynyń jetispeýshiligi saldarynan keıingi satyp alýshylar aldynda bereshek paıda bolǵan, — dedi Aslan Mádı.
Budan bólek, ınternet-dúken basshylary jańa klıentterdi tartý maqsatynda arnaıy júıe uıymdastyrǵan. Bul júıe boıynsha olardyń promokody arqyly kelgen árbir satyp alýshy úshin belgili bir mólsherde syıaqy eseptelip otyrǵan.
Qazirgi ýaqytta atalǵan qylmystyq is boıynsha 200-den astam azamat jábirlenýshi dep tanylǵan. Olarǵa keltirilgen jalpy shyǵyn kólemi 216 mıllıon teńgeni quraıdy.
Qazirgi ýaqytta tergeý amaldary jalǵasyp jatyr.
Aıta keteıik, 90 myń adamnan 25 mlrd teńge jınaǵan qarjy pıramıdasynyń uıymdastyrýshylary sottaldy.
