Astanada 6 eldiń sý mamandary bas qosty
ASTANA. KAZINFORM — Astanada aýyl sharýashylyǵyndaǵy sý resýrstaryn basqarýdy jańǵyrtýǵa arnalǵan óńirlik trenıng ótti. Bul týraly QR Sý resýrstary jáne ırrıgatsııa mınıstrligi habarlady.
Іs-sharany mınıstrlik Azyq-túlik qaýipsizdigi jónindegi Islam uıymy jáne Islam damý bankiniń qoldaýymen uıymdastyrdy.
Trenıngke QR Parlamenti Senatynyń depýtattary, máslıhattar men óńirlik atqarýshy organdardyń ókilderi, ǵylymı uıymdar men Ázerbaıjan, Qyrǵyzstan, Tájikstan, Túrikmenstan, Ózbekstan jáne Túrkııa elderiniń delegatsııalary qatysty. Sonymen qatar halyqaralyq jetekshi uıymdardyń sarapshylary, atap aıtqanda Qurǵaq aımaqtardaǵy aýyl sharýashylyǵyn zertteý halyqaralyq ortalyǵy (ICARDA) men Sý resýrstaryn basqarý halyqaralyq ınstıtýty (IWMI) bar.
Trenıng aıasynda Túrkııanyń Memlekettik gıdrotehnıkalyq qurylysjaılar basqarmasy (DSİ) ózderiniń sýarý monıtorıngine arnalǵan SUTEM tsıfrlyq platformasyn tanystyrdy. Al Ózbekstannyń Sý resýrstary mınıstrligi sýarýdy josparlaýǵa arnalǵan derekterge negizdelgen SRBISA júıesin usyndy. Sonymen qatar «Qazsýshar» RMK, Sý resýrstarynyń aqparattyq-taldaý ortalyǵy jáne óńirlik ákimdikter mamandary sý bólý tıimdiligin arttyrý, spýtnıktik monıtorıng jáne tsıfrlyq esepke alý boıynsha tájirıbelik sheshimderdi ortaǵa saldy.
Talqylaýlardyń qorytyndysy boıynsha qatysýshylar sý resýrstaryn basqarýda tsıfrlyq tehnologııalardy qoldaný aıasyn keńeıtý, óńirlik derekter men transshekaralyq sý paıdalanýdaǵy ozyq tájirıbelermen almasý, sondaı-aq kadrlyq áleýetti damytý jáne mamandardyń kásibı biliktiligin arttyrý sııaqty odan ári yntymaqtastyqtyń negizgi baǵyttaryn aıqyndady.
— Bul trenıng Memleket basshysy aıqyndaǵan negizgi strategııalyq basymdyqtardy iske asyrýǵa baǵyttalǵan. Negizgi nazar ırrıgatsııalyq ınfraqurylymdy jańǵyrtýǵa, sý resýrstaryn basqarýdy tsıfrlandyrýǵa jáne óńirlik yntymaqtastyqty nyǵaıtýǵa aýdarylǵan. Irrıgatsııa men sý menedjmentin tsıfrlandyrý — bul jaı ǵana tehnologııalyq úrdis emes, aýyl sharýashylyǵy men ekonomıkanyń jalpy turaqty damýyna baǵyttalǵan qajetti qadam, — dedi Sý resýrstary jáne ırrıgatsııa vıtse-mınıstri Talǵat Momyshev.
Aıta keteıik, Sý resýrstary salasynda ÚEU-men yntymaqtastyqty damytýǵa arnalǵan jańa keńes quryldy.