Astanada 6-12 jas aralyǵyndaǵy balalarǵa arnalǵan fýtbol ortalyǵy ashylady
ASTANA. QazAqparat - Astanada 1 mamyrdan bastap balalar fýtbol ortalyǵy óz jumysyn bastaıdy. «Astana qalasynyń fýtbol federatsııasy» ZTB habarlaýynsha, jattyǵýlar kásibı alańda - «Jas batyr» sport kesheninde ótedi, dep habarlaıdy astana.kz.
«Jas batyr» sport kesheniniń ınfraqurylymy jattyǵý jumystaryn júrgizý úshin qolaıly etip jasalǵan. Ortalyqta balalar men jasóspirimderdi jattyqtyrý sanattaryna ıe kásibı bapkerler jumys isteıdi. Munda balalar fýtboldy mekteptegi pán tárizdi úırenetin bolady. Sondaı-aq jas fýtbolshylardy tárbıeleıtin basqa da sabaqtar ótedi (jeke fýtbol ádisteri tehnıkasy, taktıkalyq qarym-qatynas). Bolashaqta balalar jattyǵý barysynda úırengen daǵdylaryn qalalyq jáne respýblıkalyq jarystarda is júzinde qoldana alady. Jattyǵý jazǵy demalys kezinde de toqtatylmaıdy. Jazda ashyq alańda ótetin jattyǵýlar balalardyń aǵzasyna oń áserin tıgizedi, al komandalyq oıyn til tabysý daǵdylaryn damytýǵa sep bolady. Balalar fýtbol ortalyǵyna 6 jastan 12 jasqa deıingi balǵyndar qabyldanady. Sportpen aınalysýǵa medıtsınalyq turǵyda jaramdy balalar aldyn ala tekserýsiz alynady. Ortalyqta bir aılyq oqytý baǵasy - 15 000 teńge, al úsh aıǵa birden aqy tólegen jaǵdaıda - 12 000 teńgeni quraıdy.
