Astanada 55 zańsyz qoqys úıindisi joıyldy
ASTANA. KAZINFORM – Elordada zańsyz qoqys úıindilerin anyqtaý jáne joıý jumystary jalǵasyp jatyr. Qazirgi ýaqytta qala aýmaǵynda anyqtalǵan 99 zańsyz qoqys ornynyń 55-i tolyq joıyldy.
Qala ákimdiginiń málimetinshe, qalǵan 44 ýchaske boıynsha jumystar júrgizilip jatyr. Jalpy kólemi 57 myń tonnaǵa jýyq qaldyq shyǵarylyp, jumystarǵa 90 arnaıy tehnıka jumyldyrylǵan.
Esil aýdanynda Hýseın ben Talal kóshesiniń jalǵasy, áýejaıǵa aparatyn tasjol jáne Áljan ana meshiti mańyndaǵy aýmaqtar tazartylýda. Munda 8 myń tonnadan astam qoqys shyǵarylǵan.
Saraıshyq aýdanynda Shámshi Qaldaıaqov kóshesi boıyndaǵy jáne LRT stantsııasy mańyndaǵy aýmaqtardan 10,5 myń tonnaǵa jýyq qaldyq áketilgen. Al Saryarqa aýdanynda jyl basynan beri anyqtalǵan 10 qoqys oshaǵynyń barlyǵy joıylyp, 11,8 myń tonnadan astam qaldyq shyǵarylǵan.
«Zańsyz qoqys úıindilerin joıý jumystary barlyq aýdanda turaqty negizde júrgizilýde. Qaıta qoqys tastaýdyń aldyn alý úshin baqylaý kúsheıtilip, beınebaqylaý kameralary ornatylýda. Sonymen qatar drondar arqyly monıtorıng uıymdastyrylyp, quqyq buzýshylarǵa qatysty ákimshilik sharalar qabyldanýda. Bul jumystar qalanyń ekologııalyq jaǵdaıyn jaqsartýǵa jáne turǵyndarǵa qolaıly orta qalyptastyrýǵa baǵyttalǵan», – dep habarlady ákimdik.
Baıqońyr aýdanynda jyl basynan beri 20 myń tonnadan astam qaldyq ekologııalyq polıgondarǵa jetkizilgen. Al Nura aýdanynda anyqtalǵan 45 ýchaskeniń 12-si iri qoqys úıindileri sanatyna jatqyzylyp, olardan 7,1 myń tonnadan astam qaldyq shyǵarylǵan.
Ekologııalyq polıtsııa jyl basynan beri abattandyrý talaptaryn buzýǵa qatysty 6 quqyq buzýshylyqty tirkep, kináli tulǵalardy ákimshilik jaýapkershilikke tartqan.
Aıta keteıik, 2025 jyldan bastap zańsyz qoqys tastaǵany úshin jaýapkershilik kúsheıtilip, aıyppul mólsheri 100-den 1000 AEK-ke deıin ulǵaıtyldy.
Buǵan deıin TazaQala platformasy arqyly 865 zańsyz qoqys úıindisi anyqtalǵany habarlandy.
