Astanada 52 qurylys nysany Astana komıssııasynyń baqylaýynda qalyp otyr
ASTANA. QazAqparat - 52 qurylys nysany Astananyń vedomstvoaralyq komıssııasy (VAK) baqylaýynda qalyp otyr, dep habarlandy elorda ákimdiginiń resmı saıtynda .
Azamattardyń jasaǵan ótinishteriniń arqasynda vedomstvoaralyq komıssııa páterlerdi, turǵyn úılerdi nemese kommertsııalyq jyljymaıtyn múlikti satyp alý úshin paıyzsyz nesıe beretin tutynýshylar kooperatıvteriniń jumysynan "Turǵyn úı qurylysyna úlestik qatysý týraly" Qazaqstan Respýblıkasynyń Zańyn buzýdyń jańa oqıǵalaryn anyqtady.
Kooperatıvterdiń qarjylyq qory kelesi ádispen qalyptasady: 10 múshesi bolǵan kezde onyń árqaısysynan 20 paıyz kóleminde bastapqy salym alynady. Jınalǵan somaǵa bir páter satyp alynady jáne belgilengen kezekpen kooperatıvtiń birinshi múshesiniń menshigine beriledi. Kelesi qatysýshylar jańa qatysýshylardyń salymdarynan nemese kooperatıvterdiń aǵymdaǵy músheleriniń aı saıynǵy salymdarynan qarjynyń jınaqtalýyn kútedi.
Búgingi kúni kelesi kooperatıvter osylaı jumys isteıdi: «Edınyı vybor», «Best Veı», «Frı Hoým» ı «Svoı kvadrat».
- Páterlerdi satyp alýdyń bul shemasyn biz «pıramıda» retinde baǵalaımyz, jáne ol senimshil azamattardy jappaı aldaýǵa alyp keledi, - dep habarlaıdy VAK.
Astana qalasynyń ákimi Áset Isekeshev Memlekettik kiris departamentine, Іshki ister departamentine jáne elorda prokýratýrasyna ondaı kompanııalardyń qyzmetine quqyqtyq baǵa berýdi jáne qajet bolǵan jaǵdaıda olardyń qyzmetin toqtatý boıynsha tıisti sharalar qabyldaýdy tapsyrdy.
Qosymsha túrde kelesini habarlaımyz. «Krysha.kz» ınternet-saıtynda kelesi sıpattaǵy jarnama ornalastyrylǵan: «Qurylys kompanııalarynan bastapqy salymsyz paıyzsyz bólip tóleý...».
Bul jerde E634, E418, E425 jáne E517 kósheleriniń qıylysynda «Oazıs-Astana» TQK salyp jatqan "Oazıs" turǵyn úı keshenindegi páterlerdi satý týraly aıtylyp otyr. Atalǵan TQK úleskerlerdiń qarjysyn tartýǵa quqyqtyq negizderi joq. Óıtkeni jer telimi jáne ruqsat berýshi qujattar «Astana City Stroy» JShS-ine tirkelgen.
Búgingi kúni memlekettik saraptamanyń oń sheshimi men qurylys júrgizýge ruqsattyń joqtyǵyna baılanysty turǵyn úı kesheniniń qurylysy bastalmaǵan.
