Astanada 500 gramm salmaqpen týǵan sábılerge arnalǵan kórme ótedi
ASTANA. QazAqparat - 17 qarashada «Astana» Ulttyq sýret galereıasynda Shala týǵan nárestelerdiń halyqaralyq kúnine oraı «Men mezgilimnen erte týdym» atty qaıyrymdylyq kórmesi ótedi.
Kórmeniń maqsaty kórermenderge 500 gramm salmaqpen mezgilinen erte týǵan balalar jaıly, olardyń ómirge degen qushtarlyǵy týraly jetkizý bolyp tabylady. Oǵan keskindeme týyndylary, kórkem fotosýretter jáne músinder qoılady.
Shara «28 Іlmek» qaıyrymdylyq qory jáne «Astana» Ulttyq sýret galereıasynyń qoldaýymen uıymdastyrylyp otyr.
2009 jyly Jańa týǵan sábılerdiń kútimi boıynsha Eýropalyq qordyń bastamasymen 17 qarasha Shala týǵan nárestelerdiń halyqaralyq kúni bolyp jarııalandy.
Sábıdiń dúnıege kelýi - kez kelgen adamnyń ómirindegi erekshe qýanysh. Alaıda, balanyń merziminen erte týýy ananyń da, balanyń da ómirine qaýipti. Shala týǵan balanyń dene salmaǵy tómen jáne tynys alý músheleri tolyq jetilmeıdi.
Kóptegen merziminen erte týǵan balalarda, aıtarlyqtaı aýytqý bolmaıdy, olardyń tipti, qabiletti bolýy ǵajap emes. Aıtalyq, Pablo Pıkasso, Vıktor Gıýgo, Volter, Charlz Darvın, Albert Eınshteın jáne t.b. aty álemge tanymal tulǵalar merziminen erte týǵan, ıaǵnı shala týǵan jandar.
2014 jyly «28 Іlmek» klýby resmı túrde qor mártebesine ıe boldy jáne qazirgi tańda Qazaqstannyń 11 qalasy: Astana, Almaty, Petropavl, Shymkent, Atyraý, Aqtóbe, Aqtaý, Óskemen, Qaraǵandy, Semeı jáne Qyzylordada óz jumystaryn atqaryp jatyr.
