Astanada 500-den astam esirtki saıty buǵattaldy
ASTANA. KAZINFORM — Astanada «Zań men tártip» qaǵıdatyn iske asyrý aıasynda qala ákiminiń orynbasary Erik Meıirhannyń tóraǵalyǵymen nashaqorlyq pen esirtki bıznesine qarsy is-qımylǵa baǵyttalǵan memlekettik organdardyń qyzmetin úılestirý jónindegi vedomstvoaralyq shtabtyń otyrysy ótti.
Kezdesý barysynda vedomstvoaralyq shtabtyń osy jyldyń birinshi toqsanyndaǵy jumysynyń qorytyndylary shyǵarylyp, aldaǵy kezeńge arnalǵan mindetter, sondaı-aq atqarýshylyq tártipti kúsheıtý máseleleri aıtyldy.
— Qazirgi jaǵdaıda esirtki zattarynyń 90%-y baılanyssyz tásilmen satylady, sondyqtan biz esirtki qylmysyna qarsy is-qımyl tásilderin ózgertip, onlaın-satý arnalarynyń jolyn kesýge jáne anyqtaýǵa basymdyq berip otyrmyz. 562 esirtki saıty buǵattaýǵa jiberildi, olardyń ishinde jastar arasynda keń taralǵandary da bar, kúmándi operatsııalary bar 378 karta buǵattaldy. 369 oqıǵa anyqtaldy, onyń ishinde 125 satý faktisi bar. Zańsyz aınalymnan 45 kg 521 gr túrli esirtki zattary, onyń ishinde 15 kg «sıntetıka» tárkilendi. Esirtkini jarnamalaý boıynsha 4 qylmystyq is qozǵaldy, 75-ten astam esirtki graffıtıi óshirildi. «Kúldirýshi gazdy» paıdalanýǵa qatysty (QR QK-niń 301-baby) 20 qylmystyq is qozǵaldy, zańsyz aınalymnan 70-ten astam ballon tárkilendi, — dep habarlady Astana qalasy Polıtsııa departamentiniń esirtki qylmysyna qarsy is-qımyl basqarmasynyń bastyǵy Maqsat Abıken.
Astana qalasy ákiminiń orynbasary Erik Meıirhan aqparattyq-túsindirý jumysyn, eń aldymen jastar arasynda kúsheıtý qajet ekenin atap ótti.
— Aqparattyq-túsindirý jumysyn, eń aldymen jastar arasynda kúsheıtý qajet, ásirese demalys kezeńi jaqyndap keledi. Osy jazda elordada sporttyq, kıbersporttyq baǵyttaǵy kóptegen buqaralyq is-shara ótedi, olardyń aıasynda jastardyń keń aýqymyn qamtıtyn iri esirtki qylmysyna aktsııalar uıymdastyrýǵa bolady, — dedi Astana qalasy ákiminiń orynbasary Erik Meıirhan.
Sondaı-aq ol esirtki bıznesine qarsy kúres úshin IT-tehnologııalardy damytý qajettigin atap ótti, onyń ishinde: qala kóshelerinde esirtki jasyryp ketýshilerdi jáne esirtki graffıtıin salýshylardy anyqtaý úshin.
Otyrys barysynda sondaı-aq mektep oqýshylary men stýdentterdi eńbek jáne qoǵamdyq qyzmetke tartý, elordanyń qoǵamdyq kólik júrgizýshilerin esirtki qoldanýǵa júıeli túrde testileýmen qamtý máseleleri qaraldy.
Aıta ketelik Pavlodarda iri esirtki arnasy joıylǵan edi.